അഡോബി ഫോട്ടോഷോപ്പിൻ്റെ ഐഫോൺ ആപ്പ് പുറത്തിറങ്ങി മാസങ്ങൾക്ക് ശേഷം, ആൻഡ്രോയിഡ് ഉപയോക്താക്കൾക്കായി ഫോട്ടോഷോപ്പിൻ്റെ ബീറ്റാ ആപ്പ് അവതരിപ്പിച്ചു. എഐ അധിഷ്‌ഠിത ടൂളുകളും അഡോബി സ്റ്റോക്കിലെ ഉള്ളടക്കങ്ങൾ ഉപയോഗിക്കാനുള്ള സൗകര്യവും ഈ ആപ്പിൽ ലഭ്യമാണ്. ഡെസ്ക്ടോപ്പ് വേർഷനിലെ നിരവധി ഫീച്ചറുകൾ ആൻഡ്രോയിഡ് ആപ്പിലും ഉൾപ്പെടുത്തിയിട്ടുണ്ട്. ചിത്രങ്ങൾ സൃഷ്ടിക്കാനും എഡിറ്റ് ചെയ്യാനും മാറ്റങ്ങൾ വരുത്താനും ഈ ആപ്പ് ഉപയോഗിക്കാം. ബീറ്റാ പരീക്ഷണ ഘട്ടത്തിൽ പല ഫീച്ചറുകളും സൗജന്യമായി ലഭിക്കും.
2025 ഫെബ്രുവരിയിൽ ഐഫോൺ ആപ്പ് പുറത്തിറങ്ങിയതിന് ശേഷം ആൻഡ്രോയിഡ് ഉപയോക്താക്കൾ ഈ ആപ്പിനായി കാത്തിരിക്കുകയായിരുന്നു. ആൻഡ്രോയിഡ് ഫോണുകളുടെ വൈവിധ്യമാർന്ന ഡിസ്പ്ലേ വലുപ്പം, റെസലൂഷൻ, ഹാർഡ്വെയർ എന്നിവയ്ക്ക് അനുയോജ്യമായ രീതിയിൽ ആപ്പ് തയ്യാറാക്കേണ്ടതിനാലാണ് ഫോട്ടോഷോപ്പിൻ്റെ ആൻഡ്രോയിഡ് വേർഷൻ വൈകിയതെന്നാണ് വിവരം.
അഡോബിയുടെ മറ്റ് ആൻഡ്രോയിഡ് ആപ്പുകളിൽ നിന്ന് വ്യത്യസ്‌തമായി, ഫോട്ടോഷോപ്പിൻ്റെ ബീറ്റാ വേർഷൻ ആൻഡ്രോയിഡ് ഫോണുകൾക്ക് പുറമെ ടാബ്ലെറ്റുകളിലും പ്രവർത്തിക്കും.
ആൻഡ്രോയിഡ് 11-നും അതിന് ശേഷമുള്ള ഓപ്പറേറ്റിംഗ് സിസ്റ്റങ്ങളിലും പ്രവർത്തിക്കുന്ന ഫോണുകളിലും ടാബ്ലെറ്റുകളിലും ഈ ആപ്പ് ലഭ്യമാണ്. മികച്ച പ്രവർത്തനത്തിനായി കുറഞ്ഞത് 8 ജിബി റാം ഉണ്ടായിരിക്കണമെന്ന് കമ്പനി ശുപാർശ ചെയ്യുന്നു.
ലെയറുകൾ, മാസ്‌കിംഗ്‌, സെലക്ഷൻ ടൂളുകൾ, ബ്രഷ് ടൂളുകൾ, ജനറേറ്റീവ് ഫിൽ, അഡ്ജസ്റ്റ്മെന്റ് ലെയർ, ബ്ലെൻഡ് മോഡ്, സൗജന്യ അഡോബി സ്റ്റോക്ക് ഉള്ളടക്കങ്ങൾ എന്നിവ ആപ്പിലുണ്ട്. ആൻഡ്രോയിഡ് ബീറ്റാ ആപ്പ് പൂർണമായും സൗജന്യമാണ്. എന്നാൽ, ഐഫോൺ ആപ്പിന് സബ്സ്ക്രിപ്ഷൻ ആവശ്യമാണ്. ബീറ്റാ പരീക്ഷണ കാലയളവിന് ശേഷം ആൻഡ്രോയിഡിലും സബ്സ്ക്രിപ്ഷൻ സംവിധാനം നടപ്പിലാക്കിയേക്കാം.
