കെഎസ്ആർടിസി ജീവനക്കാർക്കും കുടുംബാംഗങ്ങൾക്കും ഉയർന്ന ജീവിത സുരക്ഷയും കൂടുതൽ ആരോഗ്യ ആനുകൂല്യങ്ങളും ഉറപ്പാക്കുന്നതിനായി സ്റ്റേറ്റ് ബാങ്ക് ഓഫ് ഇന്ത്യയുമായി ചേർന്ന് കെഎസ്ആർടിസി ആരംഭിച്ച കോർപ്പറേറ്റ് സാലറി പാക്കേജ് 04.06.2025 മുതൽ പ്രാബല്ല്യത്തിൽ വന്നുകഴിഞ്ഞു.
കെഎസ്ആർടിസി ജീവനക്കാർക്കായി പ്രത്യേകമായി രൂപകൽപ്പന ചെയ്തിരിക്കുന്ന, കെഎസ്ആർടിസിക്ക് ഏറെ അഭിമാനകരമായ ഈ പദ്ധതി ജീവനക്കാർക്കും കുടുംബത്തിനും നിത്യജീവിതം കൂടുതൽ സുഗമമാക്കാൻ നിർണായകമാകും. പ്രസ്തുത സ്കീമിൽ ഉൾപ്പെടുത്തിയിട്ടുള്ള ആനുകൂല്യങ്ങൾ സംബന്ധിച്ചും ജീവനക്കാരുടെ നിലവിലുള്ള ശമ്പള അക്കൗണ്ടുകൾ കോർപ്പറേറ്റ് സാലറി പാക്കേജിലേക്ക് മാറ്റുന്നതിന് സ്വീകരിക്കേണ്ട നടപടിക്രമങ്ങൾ സംബന്ധിച്ചും വ്യക്തമായ നിർദ്ദേശങ്ങൾ എല്ലാ കെഎസ്ആർടിസി യൂണിറ്റുകൾക്കും നൽകിയിട്ടുണ്ട്. കൂടാതെ ഇൻഷുറൻസ് ക്ലൈം ലഭ്യമാക്കുന്നതിന് സമർപ്പിക്കേണ്ട എല്ലാ വിവരങ്ങളും കെഎസ്ആർടിസി വെബ്സൈറ്റിൽ പ്രസിദ്ധീകരിച്ചിട്ടുണ്ട്.
എസ് ബി ഐയുടെ കോർപ്പറേറ്റ് സാലറി പാക്കേജിൽ അംഗങ്ങളായ കെഎസ്ആർടിസിയിലെ ജീവനക്കാർക്ക് വാർഷിക പ്രീമിയം ഓടുക്കി എസ്ബിഐ അനുവദിക്കുന്ന ആരോഗ്യ ഇൻഷുറൻസ് പദ്ധതിയിലും ചേരാവുന്നതാണ്. ഇന്ത്യയിൽ ആയിരത്തി ഇരുന്നൂറിലധികവും കേരളത്തിലെ നൂറ്റി അഞ്ചോളവും ആശുപത്രികളിൽ ചികിത്സാ സൗകര്യമുള്ള ആരോഗ്യ ഇൻഷുറൻസ് പദ്ധതിയാണ് ‘സൂപ്പർ ടോപ്പ് ഹെൽത്ത് ഇൻഷുറൻസ്”. ജീവനക്കാർ സ്റ്റേറ്റ് ബാങ്ക് ഓഫ് ഇന്ത്യ ശാഖകളിൽ പോകാതെതന്നെ കെഎസ്ആർടിസിയുടെ ഔദ്യോഗിക വെബ്സൈറ്റിൽ ലഭ്യമാക്കിയിട്ടുള്ള വെബ്സൈറ്റ് ലിങ്കിലൂടെ ഹെൽത്ത് ഇൻഷുറൻസ് പോളിസി എടുക്കുന്നതിനുള്ള സൗകര്യവും ഒരുക്കിയിട്ടുണ്ട്.
കോർപ്പറേറ്റ് സാലറി പാക്കേജിൽ അംഗമാകുന്നതിനോ ആനുകൂല്യങ്ങൾ ലഭ്യമാകുന്നതിനോ ഏതെങ്കിലും തരത്തിലുള്ള തടസ്സം നേരിടുകയാണെങ്കിൽ പ്രസ്തുത വിവരം അഡ്മിനിസ്ട്രേറ്റീവ് ഓഫീസർ ബഡ്ജറ്റ് വിഭാഗം, കൂടാതെ ചീഫ് ഓഫീസിലെ ഹെൽപ്പ് ഡസ്ക് എന്നിവരെ ബന്ധപ്പെടാവുന്നതാണ്.
