പ്രസവിച്ച കുഞ്ഞിനെ പാറമടയില് എറിഞ്ഞു കൊലപ്പെടുത്തിയ കേസില് മാതാവിനെ ജീവപര്യന്തം തടവിന് ശിക്ഷിച്ചു. തിരുവാണിയൂര് പഴുക്കാമറ്റം വീട്ടില് ശാലിനി (40) ക്കാണ് ജീവപര്യന്തം തടവും അന്പതിനായിരം രൂപ പിഴയും കോടതി വിധിച്ചത്. സ്ത്രീകള്ക്കും കുട്ടികള്ക്കും എതിരേയുള്ള അതിക്രമങ്ങള് പരിഗണിക്കുന്ന കോടതി ജഡ്ജി കെ. സോമനാണ് ശിക്ഷ വിധിച്ചത്.
2021 ജൂണ് ഒന്നിന് രാത്രി 11 മണിയോടെയായിരുന്നു കേസിനാസ്പദമായ സംഭവം. ഭര്ത്താവുമായി അകന്നു കഴിയുകയായിരുന്നു ശാലിനി. ഇതിനിടെ ഗര്ഭിണിയായ ശാലിനി പ്രസവിച്ച ശേഷം കുഞ്ഞിനെ ഷര്ട്ടില് പൊതിഞ്ഞ് കല്ലുകെട്ടി പാറമടയില് എറിയുകയായിരുന്നു. പ്രസവശേഷം വീട്ടില് അവശ നിലയിലായ ശാലിനിയോട് നാട്ടുകാര് ആശുപത്രിയില് പോകാന് ആവശ്യപ്പെട്ടിട്ടും പോകാതിരുന്നതിനെ തുടര്ന്ന് പുത്തന്കുരിശ് പോലീസെത്തി ആശുപത്രിയില് എത്തിച്ചു. ആശുപത്രിയില്നിന്നു ലഭിച്ച വിവരങ്ങളുടെ അടിസ്ഥാനത്തില് പോലീസ് കേസ് രജിസ്റ്റര് ചെയ്ത് അന്വേഷണം തുടങ്ങി.