രാജ്യത്തെ വിനോദ രംഗം കയ്യടക്കാനുള്ള പദ്ധതിയുമായി റിലയൻസ് ജിയോ സിനിമ. റിലയൻസ് ജിയോയുടെ സ്ട്രീമിങ് സേവനമായ ജിയോ സിനിമ പുതിയ പരസ്യ രഹിത പ്രീമിയം പ്ലാനുകൾ അവതരിപ്പിച്ചു. നെറ്റ് ഫ്ളിക്‌സ്‌, പ്രൈം വീഡിയോ ഉൾപ്പടെ ഉയർന്ന നിരക്കിലുള്ള പ്രീമിയം പ്ലാനുകൾ നൽകുന്ന പ്ലാറ്റ്ഫോമുകളെ വെല്ലുവിളിച്ചുകൊണ്ടാണ് പ്രതിമാസം 29 രൂപയിൽ തുടങ്ങുന്ന പ്രീമിയം പ്ലാനുകൾ ജിയോ സിനിമ അവതരിപ്പിച്ചിരിക്കുന്നത്.
ഈ പ്ലാനുകളിൽ പരസ്യങ്ങൾ പ്രദർശിപ്പിക്കില്ല, 4കെ നിലവാരത്തിൽ വീഡിയോകൾ ആസ്വദിക്കാം, ഓഫ്‌ലൈൻ ആയി ഉള്ളടക്കം ആസ്വദിക്കാം. സിനിമകൾ, ഹോളിവുഡ് ബ്ലോക്ക്‌ബസ്റ്റർ സിനിമകൾ, അന്താരാഷ്ട്ര ടെലിവിഷൻ സീരീസുകൾ, കുട്ടികൾക്കുള്ള പരിപാടികൾ, ടിവി പരിപാടികൾ എന്നിവയെല്ലാം സ്മ‌ാർട് ടിവികൾ ഉൾപ്പടെ ഏത് ഉപകരണത്തിലും ആസ്വദിക്കാനാവും.
89 രൂപയുടെ ഫാമിലി പ്ലാനിൽ നാല് സ്ക്രീനുകളിൽ ഒരേ സമയം ജിയോ സിനിമ ഉപയോഗിക്കാനാവും. നിലവിലുള്ള ജിയോ പ്രീമിയം പ്ലാനുകൾ 89 രൂപയുടെ പ്ലാനിലേക്ക് ഓട്ടോമാറ്റിക് ആയി അപ്ഗ്രേഡ് ചെയ്യപ്പെടും. അതേസമയം ഐപിഎൽ പോലുള്ള കായിക വിനോദങ്ങൾ പരസ്യങ്ങളോടുകൂടി സൗജന്യമായി ആസ്വദിക്കാനാവും.
പീക്കോക്ക്, എച്ച്ബിഒ, പാരാമൗണ്ട്, വാർണർ ബ്രോസ്. ഡിസ്‌കവറി തുടങ്ങിയ ആഗോള പ്രൊഡക്ഷൻ കമ്പനികളുടെ ഉള്ളടക്കങ്ങൾ ജിയോ സിനിമ പ്രീമിയം വരിക്കാർക്ക് ആസ്വദിക്കാനാവും. ഗെയിം ഓഫ് ത്രോൺസ്, ഹൗസ് ഓഫ് ദി ഡ്രാഗൺ ഉൾപ്പടെയുള്ള ഉള്ളടക്കങ്ങൾ ഇക്കൂട്ടത്തിൽ പെടും. ഇവയുടെ ഇന്ത്യൻ ഭാഷയിലേക്ക് മൊഴിമാറ്റം ചെയ്‌തവയും ലഭ്യമാണ്.
