അയർലൻഡിൽ ഇന്ത്യക്കാരന് അക്രമിസംഘത്തിൻ്റെ ക്രൂരമർദനം. തലസ്ഥാനമായ ഡബ്ലിന് സമീപം പാർക്ക്ഹിൽ റോഡിൽ ശനിയാഴ്‌ചയായിരുന്നു സംഭവം. അക്രമികൾ ഇദ്ദേഹത്തിന്റെ വസ്ത്രങ്ങൾ വലിച്ചുകീറി അർധനഗ്നനാക്കുകയും ചെയ്തു. ആക്രമണത്തിനിരയായ വ്യക്തി മൂന്നാഴ്ച മുൻപാണ് അയർലൻഡിലെത്തിയത്. നാൽപ്പതുകളാണ് ഇദ്ദേഹത്തിന്റെ പ്രായം. പേരുവിവരങ്ങൾ പുറത്തുവിട്ടിട്ടില്ല.
ഇന്ത്യക്കാരന് നേരെയുണ്ടായത് വംശീയ ആക്രമണമാണോയെന്ന് സംശയിക്കുന്നതായി അധികൃതർ അറിയിച്ചു. ഇദ്ദേഹത്തിന്റെ മൂക്കിനും കൈകാലുകൾക്കും ഗുരുതരമായി പരിക്കേറ്റിട്ടുണ്ട്. രക്തമൊലിപ്പിച്ചു നിൽക്കുന്ന ചിത്രങ്ങൾ പുറത്തെത്തിയിട്ടുണ്ട്. സമീപത്തെ ആശുപത്രിയിൽ പ്രവേശിപ്പിച്ച ഇദ്ദേഹത്തെ ഞായറാഴ്ച രാവിലെ ഡിസ്‌ചാർജ് ചെയ്തു.
സംഭവത്തിൽ അന്വേഷണം ആരംഭിച്ചതായും അറസ്റ്റുകളൊന്നും ഇതുവരെ രേഖപ്പെടുത്തിയിട്ടില്ലെന്നും അയർലൻഡ് പോലീസ് അറിയിച്ചു. അയർലൻഡിലെ ഇന്ത്യൻ അംബാസഡർ സംഭവത്തെ അപലപിച്ച് രംഗത്തെത്തി.
