സാംസങ് ഗാലക്‌സി സ്‌മാർട്ഫോണുകളിൽ പ്രീ ഇൻസ്റ്റാൾ ചെയ്‌തുവരുന്ന ഡിഫോൾട്ട് ബ്രൗസറായ ‘സാംസങ് ഇൻ്റർനെറ്റ്’ ഇനി വിൻഡോസ് കംപ്യൂട്ടറുകളിലും ലഭ്യമാവും. ക്രോമിയം അടിസ്ഥാനമാക്കിയുള്ള വെബ് ബ്രൗസർ ഗൂഗിൾ ക്രോമിന് സമാനമായ രൂപകൽപനയിലാണ് ഒരുക്കിയിട്ടുള്ളത്.
വിൻഡോസ് 10, വിൻഡോസ് 11 ഒഎസുകളിൽ സാംസങ് ഇൻ്റർനെറ്റ് ഇൻസ്റ്റാൾ ചെയ്യാനാവും. മൈക്രോസോഫ്റ്റ് സ്റ്റോറിൽ ഇത് ലഭ്യമാണ്. x64 ബിറ്റ് കംപ്യൂട്ടറുകളിൽ മാത്രമാണ് ഇത് പ്രവർത്തിക്കുക. 130 എംബി ആണ് ബ്രൗസറിന്റെ സൈസ്. മൈക്രോസോഫ്റ്റ് സർഫേസിലും ഇത് ഇൻസ്റ്റാൾ ചെയ്യാം.
സാംസങ് അക്കൗണ്ട് ഉപയോഗിച്ച് ഇതിൽ സൈൻ ഇൻ ചെയ്യണം. ഇതുവഴി കംപ്യൂട്ടറിലേയും ഫോണിലേയും ബ്രൗസറുകൾ തമ്മിൽ സിങ്ക് ചെയ്യാം. ബ്രൗസിങ് ഹിസ്റ്ററി, സേവ് ചെയ്‌ത സന്ദേശങ്ങൾ, തുറന്നുകിടക്കുന്ന ടാബുകൾ, ബുക്ക് മാർക്കുകൾ എന്നിവയാണ് സിങ്ക് ചെയ്യപ്പെടുക. പാസ് വേഡുകൾ സിങ്ക് ചെയ്യില്ല. എന്നാൽ ആ സൗകര്യം ഭാവിയിൽ ഉൾപ്പെടുത്തിയേക്കാം.
ആഡ്ബ്ലോക്കറുകൾ, ഇൻകൊഗ്നിറ്റൊ മോഡ്, ഡാർക്ക് മോഡ് എന്നിവയും സാംസങ് ഇന്റർനെറ്റ് ബ്രൗസറിൽ പ്രവർത്തിക്കും.
