ഇന്ത്യൻ ക്രിക്കറ്റ് താരം വിരാട് കോലിയുടെ സ്വത്തുക്കളുടെ ആകെ മൂല്യം ആയിരം കോടി കടന്നതായി റിപ്പോർട്ട്. സ്റ്റോക് ഗോ പുറത്തുവിട്ട കണക്കു പ്രകാരം കോലിയുടെ സ്വത്തിന്റെ മൂല്യം 1050 കോടി രൂപയാണ്. ലോകത്തിലെ ഏറ്റവും സമ്പന്നരായ ക്രിക്കറ്റ് താരങ്ങളിൽ ഒരാളാണു കോലി. ബിസിസിഐയുടെ വാർഷിക ശമ്പളമായി കോലിക്കു കിട്ടുന്നത് ഏഴു കോടി രൂപയാണ്.
ഐപിഎല്ലിൽ റോയൽ ചാലഞ്ചേഴ്സ് ബാംഗ്ലൂർ ഒരു സീസണിന് 15 കോടി നൽകും. ഇതിനു പുറമേ കളിക്കുന്ന ഓരോ മത്സരങ്ങൾക്കും മാച്ച് ഫീസ് വേറെ ലഭിക്കും. സൂപ്പർ താരത്തെ ഇൻസ്റ്റഗ്രാമിൽ മാത്രം 250 ദശലക്ഷത്തിലേറെ പേർ പിന്തുടരുന്നുണ്ട്.
ഇൻസ്റ്റഗ്രാമിൽ കോലിയുടെ ഒരു പോസ്റ്റിന്റെ വില 8.90 കോടി രൂപയാണ്. ഒരു ട്വീറ്റിന് 2.50 കോടിയും കോലി വാങ്ങുന്നുണ്ട്.
സ്റ്റാർട്ടപ്പുകളിൽ നിക്ഷേപങ്ങളുള്ളതിനു പുറമേ, ഇന്ത്യൻ താരത്തിനു സ്വന്തമായി ബിസിനസുകളുമുണ്ട്.
എട്ട് സ്റ്റാർട്ടപ്പുകളിലാണ് കോലി നിക്ഷേപം നടത്തിയിട്ടുള്ളത്. പതിനെട്ടിലേറെ ബാൻഡുകളുമായി താരം സഹകരിക്കുന്നുണ്ട്. ബ്രാൻഡുകളുടെ പരസ്യങ്ങൾക്കായി ഒരു ദിവസത്തിന് 7.5 കോടി മുതൽ 10 കോടി രൂപവരെ കോലിക്കു നൽകണം. കോലിക്കു രണ്ടു വീടുകളാണുള്ളത്. ഒന്ന് മുംബൈയിലും മറ്റൊന്ന് ഗുരുഗ്രാമിലും. ഇതിന്റെ മൂല്യം 100 കോടിക്കു മുകളിലാണ്.
ഒരു ടെസ്റ്റ് മത്സരത്തിന് കോലിക്കുള്ള ഫീസ് 15 ലക്ഷം രൂപയാണ്.
ഏകദിനത്തിൽ ആറും ട്വന്റി20യിൽ മൂന്നു ലക്ഷം രൂപയും കിട്ടും. ഇന്ത്യൻ സൂപ്പർ ലീഗിൽ എഫ്സി ഗോവ ടീമിൽ പങ്കാളിത്തമുണ്ട്. ഇതിനു പുറമേ ടെന്നിസിലും ഗുസ്തിയിലും കോലിക്ക് ടീമുകളുണ്ട്. 31 കോടിയോളം മൂല്യമുള്ള ആഡംബര കാറുകളുടെ ശേഖരമാണ് താരത്തിനുള്ളത്.
