ചൈനയിലെ ഇസ്രയേൽ എംബസി ഉദ്യോഗസ്ഥനു നേരെ ആക്രമണമുണ്ടായതായി ഇസ്രയേൽ വിദേശകാര്യ മന്ത്രാലയം. വെള്ളിയാഴ്ചയാണ് ആക്രമണമുണ്ടായത്. പരുക്കേറ്റ ഉദ്യോഗസ്ഥനെ ആശുപത്രിയിൽ പ്രവേശിപ്പിച്ചുവെന്നും അപകടനില തരണം ചെയ്തുവെന്നും അധികൃതർ അറിയിച്ചു. എംബസിയുടെ പരിസരത്തുവച്ചല്ല ആക്രമണം ഉണ്ടായത്. ആരാണ് ആക്രമിച്ചതെന്നു കണ്ടെത്താനായില്ലെന്നും മന്ത്രാലയം അറിയിച്ചു. കൂടുതൽ വിവരങ്ങൾ പുറത്തുവിട്ടില്ല.
ഹമാസിനെ അനുകൂലിക്കുന്ന തരത്തിൽ ചൈന പ്രസ്താവന നടത്തിയതിനെ ഇസ്രയേൽ അംബസഡർ റാഫി ഹർപാസ് വിമർശിച്ചതിനു പിന്നാലെയാണ് ആക്രമണം.
യുഎസ്എ, ബ്രിട്ടൻ, ഫ്രാൻസ്, ജർമനി തുടങ്ങിയ രാജ്യങ്ങളിലും പലസ്തീൻ അനുകൂല പ്രതിഷേധങ്ങൾക്കു സാധ്യതയുണ്ടെന്ന മുന്നറിയിപ്പിനെ തുടർന്ന് സുരക്ഷ വർധിപ്പിച്ചിരുന്നു. ഇസ്രയേൽ – ഹമാസ് സംഘർഷത്തിന്റെ പശ്ചാത്തലത്തിൽ ഈ രാജ്യങ്ങളിലെല്ലാം പലസ്തീൻ അനുകൂലികൾ വ്യാപക പ്രകടനം സംഘടിപ്പിച്ചിരുന്നു. ജൂത കേന്ദ്രങ്ങളെയും ഇസ്രയേൽ എംബസികളെയും ലക്ഷ്യമിട്ട് ആക്രമണത്തിനു സാധ്യതയുണ്ടെന്നും മിക്ക രാജ്യങ്ങളിലും മുന്നറിയിപ്പുണ്ട്.
