നിർമിതബുദ്ധി ഉപയോഗിച്ച് ചിത്രങ്ങൾ നിർമിക്കുന്ന സാങ്കേതിക വിദ്യയുടെ പരിഷ്കരിച്ച പുതിയ പതിപ്പ് അവതരിപ്പിച്ച് ഗൂഗിൾ. ഇമേജൻ-2 എന്നാണ് ഇതിന് പേര് നൽകിയിരിക്കുന്നത്. വാക്കുകളെ ചിത്രങ്ങളാക്കി മാറ്റാൻ കഴിവുള്ള ഈ ടൂൾ ഗൂഗിളിന്റെ വെർട്ടെക്‌സ് എഐ ഉപയോഗിക്കുന്ന ഉപഭോക്താക്കൾക്ക് ലഭ്യമാണ്.
എഴുതി നൽകുന്ന നിർദേശങ്ങളിൽ നിന്ന് കൂടുതൽ മികവുള്ള ചിത്രങ്ങൾ നിർമിക്കാൻ ഇമേജൻ 2 ന് സാധിക്കും. ഗൂഗിൾ ഡീപ്പ് മൈൻഡ് വികസിപ്പിച്ച സാങ്കേതിക വിദ്യയാണ് ഇതിൽ ഉപയോഗിച്ചിരിക്കുന്നത്.
ഇമേജൻ 2 ന് ചെയ്യാൻ സാധിക്കുന്ന ചില കാര്യങ്ങളാണ് താഴെ പറയുന്നവ.
. നിങ്ങൾ പറയുന്ന വാക്കുകളിൽ നിന്ന് വളരെ മനോഹരവും വ്യക്തവുമായ ചിത്രങ്ങൾ നിർമിക്കുക.
. ചിത്രങ്ങളിൽ വിവിധ ഭാഷകളിൽ വാക്കുകൾ കൃത്യമായി എഴുതുക.
. കമ്പനികൾക്കും ഉൽപ്പന്നങ്ങൾക്കുമായി ലോഗോകൾ സൃഷ്‌ടിച്ച് അവ ചിത്രങ്ങളിൽ ചേർക്കുക.
. ഒരു ചിത്രത്തിൽ എന്താണുള്ളത് എന്നതിനെക്കുറിച്ചുള്ള ചോദ്യങ്ങൾക്ക് ഉത്തരം നൽകുകയും വിശദമായ അടിക്കുറിപ്പുകൾ എഴുതുകയും ചെയ്യുക.
. ചൈനീസ്, ഹിന്ദി, ജാപ്പനീസ്, കൊറിയൻ, പോർച്ചുഗീസ്, ഇംഗ്ലീഷ്, സ്പാനിഷ് തുടങ്ങി നിരവധി ഭാഷകളിൽ ചിത്രങ്ങൾ നിർമ്മിക്കുക. കൂടുതൽ ഭാഷകൾ താമസിയാതെ ലഭ്യമാകും.
. ഈ പുതിയ ഇമേജൻ 2 ൽ സുരക്ഷയും സ്വകാര്യതയും വളരെയധികം ശ്രദ്ധിക്കുന്നു. ഉത്തരവാദിത്വം, സുരക്ഷ എന്നിവ സംബന്ധിച്ചുള്ള ഗൂഗിളിന്റെ നിയമങ്ങൾ പാലിക്കുന്നുണ്ടെന്ന് ഉറപ്പുവരുത്തുന്ന സൗകര്യങ്ങളും ഇമേജൻ 2 ലുണ്ട്.
ഉപഭോക്താക്കൾ നിർമിക്കുന്ന ചിത്രങ്ങളുമായി ബന്ധപ്പെട്ട് നിയമ പ്രശ്നങ്ങൾ ഉണ്ടായാൽ ഗൂഗിളിൽ നിന്ന് അധിക പിന്തുണ ലഭിക്കും. ഇമേജൻ 2 ൽ നിർമിക്കുന്ന ചിത്രങ്ങളുടെ പകർപ്പാവകാശം, ഉടമസ്ഥാവകാശം എന്നിവ സംബന്ധിച്ച പ്രശ്‌നങ്ങളിലും ഗൂഗിൾ ഉപഭോക്താക്കൾക്ക് പിന്തുണ നൽകും.
സ്‌നാപ്‌ചാറ്റിന്റെ മാതൃസ്ഥാപനമായ സ്‌നാപ്പ്, ഷട്ടർസ്റ്റോക്ക്, കാൻവ എന്നിവയെല്ലാം എഐ ചിത്രനിർമാണത്തിന് ഉപയോഗിക്കുന്നത് ഈ സാങ്കേതിക വിദ്യയാണ്. ഇമേജൻ 2 ഉപയോഗിക്കാൻ ആഗ്രഹമുള്ളവർക്ക് ഗൂഗിൾ ക്ലൗഡ് വെബ്സൈറ്റിൽ നിന്ന് കൂടുതൽ വിവരങ്ങൾ അറിയാം.
