പുതിയ ബ്രോഡ്‌കാസ്റ്റ് റെക്കോഡ് കുറിച്ച് ഈ വർഷം നടന്ന ചാമ്പ്യൻസ് ട്രോഫി ടൂർണമെൻ്റ്. ചാമ്പ്യൻസ് ട്രോഫി ചരിത്രത്തിൽ തന്നെ ഏറ്റവും കൂടുതൽ സമയം ആളുകൾ കണ്ട ടൂർണമെൻ്റായി ഇത് മാറി. ആഗോളതലത്തിൽ 368 ബില്ല്യൺ വ്യൂയിങ് മിനിറ്റ്സോടെയാണ് റെക്കോഡ് നേട്ടം. ഐസിസിയാണ് വിവരം പുറത്തുവിട്ടത്.
കഴിഞ്ഞ വർഷത്തേക്കാൾ 19% വർധനവാണ് രേഖപ്പെടുത്തപ്പെട്ടിട്ടുള്ളത്. ഇന്ത്യയും ന്യൂസീലൻഡും തമ്മിൽ നടന്ന ഫൈനൽ, ഏറ്റവും കൂടുതൽ സമയം തത്സമയം കാണപ്പെട്ട ചാമ്പ്യൻസ് ട്രോഫി മത്സരമെന്ന റെക്കോഡും സ്വന്തമാക്കി. 65.3 ബില്ല്യൺ ലൈവ് വ്യൂയിങ് മിനിറ്റ്സാണ് മത്സരത്തിൻ്റേത്. തത്സമയം മത്സരം കണ്ട സമയം പരിഗണിക്കുമ്പോൾ ഇത് ഐസിസിയുടെ ചരിത്രത്തിൽ തന്നെ മൂന്നാമത്തേതാണ്. 2023 ഏകദിന ക്രിക്കറ്റ് ലോകകപ്പിലെ ഇന്ത്യയുടെ സെമിയും ഫൈനലുമാണ് മുന്നിൽ.
പാകിസ്താനിലും യുഎഇയിലുമായി ഹൈബ്രിഡ് മോഡലിലാണ് ഇത്തവണത്തെ ചാമ്പ്യൻസ് ട്രോഫി ടൂർണമെൻ്റ് നടന്നത്. ഗ്രൂപ്പ് ഘട്ടത്തിൽ ബംഗ്ലാദേശ്, പാകിസ്താൻ, ന്യൂസീലൻഡ് ടീമുകളെയും സെമിയിൽ ഓസ്ട്രേലിയയെയും മറികടന്നെത്തിയ ഇന്ത്യ, കലാശപ്പോരിൽ കിവികളെയും തകർത്താണ് ചാമ്പ്യൻസ് ട്രോഫിയിൽ മുത്തമിട്ടത്. രോഹിത് ശർമയുടെ കീഴിൽ ആധികാരികമായിരുന്നു എല്ലാ ജയങ്ങളും. ടൂർണമെൻ്റിൽ ഒരു കളിയും തോൽക്കാതെ ഫൈനലിലെത്തിയ ഏക ടീമും ഇന്ത്യതന്നെയായിരുന്നു.
