സോഷ്യൽ മീഡിയ പ്ലാറ്റ്ഫോമായ ഫേസ്ബുക്കിലോ എക്സിലോ അശ്ലീല പോസ്റ്റ് ലൈക്ക് ചെയ്യുന്നത് കുറ്റകരമല്ലെന്ന് അലഹാബാദ് ഹൈക്കോടതി. എന്നാൽ ഇവ ഷെയർ ചെയ്യുന്നത് വിവര സാങ്കേതിക നിയമത്തിലെ 67 വകുപ്പു പ്രകാരം കുറ്റകരമാണെന്ന് കോടതി പറഞ്ഞു. പോസ്റ്റ് ഷെയർ ചെയ്യുന്നതോ റിട്വീറ്റ് ചെയ്യുന്നതോ നിയമത്തിൽ പറയുന്ന, പ്രചരിപ്പിക്കലിൽ ഉൾപ്പെടും. ഇത് ശിക്ഷ ലഭിക്കാവുന്ന കുറ്റമാണ്. എന്നാൽ കുറ്റകരമായ പോസ്റ്റ് ലൈക്ക് ചെയ്യുന്നത് പ്രചരിപ്പിക്കൽ എന്നതിന്റെ നിർവചനത്തിൽ വരില്ലെന്ന് കോടതി വ്യക്തമാക്കി.
പ്രകോപനപരമായ പോസ്റ്റ് ലൈക്ക് ചെയ്തതിന് പൊലീസ് കേസെടുത്തതിന് എതിരെ സമർപ്പിച്ച ഹർജിയിലാണ് ജസ്റ്റിസ് കുമാർ സിങ് ദേശ്വാളിന്റെ ഉത്തരവ്. സമൂഹത്തിൽ സ്പർധ ഉണ്ടാക്കുംവിധമുള്ള പോസ്റ്റിൽ ഹർജിക്കാരൻ ലൈക്ക് ചെയ്തെന്നാണ് പൊലീസ് ഉന്നയിച്ച വാദം. ഐടി ആക്ട് 67-ാം വകുപ്പു പ്രകാരമാണ് കേസ് രജിസ്റ്റർ ചെയ്തത്. ഈ വകുപ്പ് അശ്ലീല ഉള്ളടക്കം സംബന്ധിച്ചാണെന്നും പ്രകോപനപരമായ ഉള്ളടക്കം ഇതിന്റെ പരിധിയിൽ വരില്ലെന്നും കോടതി പറഞ്ഞു.
