ഇന്ത്യയിലെ ഏറ്റവും വലിയ വായ്പാ ദാതാവായ എസ്.ബി.ഐയുടെ അറ്റാദായത്തിൽ 178 ശതമാനം വർധന. ഏപ്രിൽ-ജൂൺ പാദത്തിലെ ലാഭം കഴിഞ്ഞ വർഷത്തെ 6,068 കോടി രൂപയിൽനിന്ന് 16,884 കോടിയായി. കഴിഞ്ഞ പാദവുമായ താരതമ്യം ചെയ്യുമ്പോൾ 1.13 ശതമാനമാണ് വർധന.
ബാങ്കിന്റെ മൊത്തം നിഷ്ക്രിയ ആസ്തി 3.91 ശതമാനത്തിൽനിന്ന് 2.76 ശതമാനമാകുകയും ചെയ്തു. വിപണിയുടെ പ്രതീക്ഷകൾക്കപ്പുറമായിരുന്നു ബാങ്കിന്റെ അറ്റാദായം. നികുതിക്കുശേഷമുള്ള ലാഭം 13,760 കോടി രൂപ മുതൽ 16,340 കോടി രൂപവരെയാകുമെന്നായിരുന്നു വിലയിരുത്തൽ.
അറ്റ പലിശ വരുമാനത്തിലും വർധനവുണ്ട്. 38,905 കോടി രൂപയാണ് ഈയിനത്തിൽ ലഭിച്ചത്. പ്രവർത്തന ലാഭമാകട്ടെ 12,753 കോടി രൂപയിൽനിന്ന് 25,297 കോടിയുമായി. 98.37 ശതമാനമാണ് വർധന.
ജൂണിൽ അവസാനിച്ച പാദത്തിലെ കണക്കു പ്രകാരം 33.03 ലക്ഷം കോടി രൂപയാണ് ബാങ്ക് വായ്പയായി നൽകിയിട്ടുള്ളത്. കഴിഞ്ഞ വർഷത്തെ 29 ലക്ഷം കോടി രൂപയിൽനിന്ന് 14 ശതമാനമാണ് ഈയിനത്തിലെ വർധന.
