ഫോട്ടോ ഐഡൻ്റിറ്റി കാർഡുകൾ (ഇപിഐസി) വോട്ടർമാർക്ക് വേഗത്തിൽ വിതരണം ചെയ്യുന്നതിനായി പുതിയ നടപടി ക്രമങ്ങൾ അവതരിപ്പിച്ച് തിരഞ്ഞെടുപ്പ് കമ്മിഷൻ. ആദ്യമായി വോട്ടർ ഐഡന്റ്റിറ്റി കാർഡ്, നിലവിലെ കാർഡിൽ മാറ്റം വരുത്തൽ എന്നിവ അപ്ഡേറ്റ് ചെയ്തു കഴിഞ്ഞാൽ 15 ദിവസത്തിനുള്ളിൽ ഫോട്ടോ പതിച്ച ഐഡന്റിറ്റി കാർഡുകൾ വിതരണം ചെയ്യും വിധമാണ് പുതിയ നടപടിക്രമം.

ഇലക്ടറൽ റജിസ്ട്രേഷൻ ഓഫിസർ (ERO) വഴി ഫോട്ടോ ഐഡന്റിറ്റി കാർഡുകൾ തയാറാകുന്നത് മുതൽ തപാൽ വകുപ്പ് വോട്ടർക്ക് കാർഡുകൾ കൈമാറുന്നതുവരെയുള്ള ഓരോ ഘട്ടത്തിന്റെയും തത്സമയ ട്രാക്കിങ് പുതിയ സംവിധാനം ഉറപ്പാക്കും. ഓരോ ഘട്ടത്തിലും വോട്ടർമാർക്ക് എസ്എംഎസ് വഴി അറിയിപ്പുകൾ ലഭിക്കും. ഇതിനായി ഇസിഐ നെറ്റ് പ്ലാറ്റ്ഫോമിൽ ഐടി മൊഡ്യൂൾ നടപ്പാക്കിയിട്ടുണ്ട്.

പുതിയ ഐടി പ്ലാറ്റ്ഫോം വഴി നിലവിലുള്ള സംവിധാനം പുനഃക്രമീകരിച്ചും പ്രവർത്തനം കാര്യക്ഷമമാക്കിയും നിലവിലുള്ള നടപടിക്രമങ്ങൾ മാറ്റി സ്ഥാപിക്കും. തടസ്സമില്ലാത്ത വിതരണത്തിന് വേണ്ടി തപാൽ വകുപ്പിൻ്റെ ആപ്ലിക്കേഷൻ പ്രോഗ്രാം ഇന്റർഫേസ് (എപിഐ) ഇസിഐ നെറ്റുമായി സംയോജിപ്പിക്കും. ഡാറ്റ സുരക്ഷ നിലനിർത്തിക്കൊണ്ട് സേവന വിതരണം മെച്ചപ്പെടുത്തുക എന്നതാണ് ലക്ഷ്യം.




