ഓൺലൈൻ റമ്മി കളിച്ചുണ്ടായ നഷ്ട‌ം നികത്താൻ മാല പിടിച്ചുപറിച്ച യുവാവ് പിടിയിൽ. പാലാ ഭരണങ്ങാനം സ്വദേശി അമൽ അഗസ്റ്റിനാണ് പിടിയിലായത്. റമ്മി കളിച്ച് മൂന്ന് ലക്ഷം രൂപ നഷ്ട‌മായ അമൽ, 80കാരിയുടെ കഴുത്തിൽ കത്തി വച്ച് മാല പിടിച്ചുപറിക്കുകയായിരുന്നു. ഇലവുംതിട്ട പൊലീസാണ് പ്രതിയെ പിടികൂടിയത്.
പത്തനംതിട്ട നെടിയകാലയിൽ നവംബർ 23നാണ് കേസിനാസ്‌പദമായ സംഭവം. സിസിടിവി തെളിവുകളുടെയും പ്രതി സഞ്ചരിച്ച സ്കൂട്ടർ കേന്ദ്രീകരിച്ചും നടത്തിയ അന്വേഷണത്തിനൊടുവിലാണ് അമലിനെ പിടികൂടിയത്. മറ്റൊരാൾ മോഷ്‌ടിച്ചതാണെന്ന തോന്നലുണ്ടാക്കി ഇതിനുമുൻപ് സ്വന്തം വീട്ടിൽനിന്നും അമൽ 35,000 രൂപ മോഷ്ടിച്ചിരുന്നു. ഇതും റമ്മി കളിക്കാണ് ഉപയോഗിച്ചത്.
സ്ത്രീകൾ ഒറ്റയ്ക്കു നടത്തുന്ന കടകളിലും മോഷണം നടത്താനായി ഇയാൾ ശ്രമിച്ചിരുന്നു. ഇതിനുശേഷമാണ് ഒറ്റയ്ക്കു താമസിക്കുന്ന വയോധികയുടെ മാല മോഷ്‌ടിച്ചത്. പ്രതിയും അച്ഛനും സഹോദരിയുടെ വീടിനടുത്ത് റബർ ടാപ്പിങ് ജോലിയുടെ ഭാഗമായി വാടകയ്ക്ക് വീടെടുത്ത് താമസിക്കുകയായിരുന്നു.
