അദാനിയുടെ പോക്കറ്റിൽ പണം നിറയ്ക്കുന്ന തിരക്കിലാണ് ബി.ജെ.പി.യെന്ന് കോൺഗ്രസ് എം.പി. രാഹുൽ ഗാന്ധി. നിയമസഭാ തിരഞ്ഞെടുപ്പ് നടക്കാനിരിക്കുന്ന രാജസ്ഥാനിൽ കോൺഗ്രസ് നടത്തിയ റാലിക്കിടെയായിരുന്നു രാഹുൽ ബി.ജെ.പി.യെ കടന്നാക്രമിച്ചത്.
രാജ്യത്ത് നിന്ന് കള്ളപ്പണം തുടച്ചുമാറ്റിയില്ലെങ്കിൽ തന്നെ തൂക്കിക്കൊല്ലു എന്നായിരുന്നു നരേന്ദ്രമോദിയുടെ പ്രസ്താവന. കോവിഡ് കാലത്ത്
രാജ്യത്താകമാനം ആളുകൾ മരിച്ചു വീഴുമ്പോൾ, ഓക്സിജനും മരുന്നുമില്ലാതെ ബുദ്ധിമുട്ടുമ്പോൾ പാത്രം കൊട്ടാനും മൊബൈലിൽ ടോർച്ച്
തെളിക്കാനുമായിരുന്നു മോദിയുടെ ആഹ്വാനം. അതേസമയം രാജസ്ഥാനിൽ സർക്കാർ വീടുകളിൽ ഭക്ഷണമെത്തിച്ചു, മരുന്ന് വിതരണം ചെയ്ത് നിരവധി പേരുടെ ജീവൻ രക്ഷിച്ചു. കാരണം രാജസ്ഥാനിൽ പാവപ്പെട്ട മനുഷ്യരെ സാധാരണക്കാരായ കർഷകരെ, തൊഴിലാളികളെ ചേർത്ത് പിടിക്കുന്ന സർക്കാരായിരുന്നു. കോൺഗ്രസ് പാവപ്പെട്ടവരുടെ പോക്കറ്റിൽ പണമെത്തിക്കാൻ ശ്രമിക്കുമ്പോൾ ബി.ജെ.പി. അദാനിയുടെ പോക്കറ്റിൽ പണം നിറയ്ക്കുന്ന തിരക്കിലായിരുന്നു. – രാഹുൽ ഗാന്ധി പറഞ്ഞു.
മോദി സർക്കാർ ജി.എസ്.ടി. കൊണ്ടുവന്നു. അതോടെ രാജ്യത്താദ്യമായി പാവപ്പെട്ട കർഷകർക്ക് നികുതിയടയ്ക്കേണ്ടി വന്നു. നോട്ട് നിരോധനം കൊണ്ടുവന്ന് ചെറുകിട വ്യവസായം ചെയ്യുന്ന സാധാരണക്കാരുടെ കച്ചവടം നിർത്തിച്ചു. എവിടെ നോക്കിയാലും അദാനി പുതിയ ബിസിനസ് ആരംഭിക്കുന്നു. വിമാനത്താവളങ്ങളും തുറമുഖങ്ങളും സിമന്റ് പ്ലാന്റുകളുമെല്ലാം അവരുടേതാണ്. മോദി അദാനിക്ക് വേണ്ടിയാണ് അധ്വാനിക്കുന്നത്. പണക്കാരോടൊപ്പമാണ് ബി.ജെ.പി.- രാഹുൽ വ്യക്തമാക്കി.
ഞാൻ നിങ്ങളെ ഒരു കാര്യമോർമിപ്പിക്കുന്നു. രാജസ്ഥാനിൽ ബി.ജെ.പി. സർക്കാർ രൂപീകരിച്ചാൽ കോൺഗ്രസ് സർക്കാർ നടപ്പിലാക്കിയ എല്ലാ ജനക്ഷേമ പദ്ധതികളും അവർ റദ്ദാക്കും. പകരം കോടീശ്വരന്മാരെ സഹായിക്കാനുള്ള പദ്ധതികൾ കൊണ്ടുവരും- രാഹുൽ ഗാന്ധി കൂട്ടിച്ചേർത്തു.
