സാംസങ് സ്മാർട്ഫോണുകളിലേക്കായി പുതിയ ഗാലക്സി എഐ പ്രഖ്യാപിച്ച് കമ്പനി. ഫോൺ കോളുകൾ തത്സമയം തർജ്ജമചെയ്യാൻ കഴിവുള്ള എഐ അധിഷ്ഠിത ഫീച്ചറോടുകൂടിയാണ് ഗാലക്സി എഐ എത്തുന്നത്. എഐ രംഗത്തെ മുൻനിര കമ്പനികളുമായി സഹകരിച്ച് ഒരുക്കിയ ക്ലൗഡ് അധിഷ്ഠിത എഐയും സാംസങ് വികസിപ്പിച്ച എഐയും അടിസ്ഥാനമാക്കിയാണ് ഗാലക്സി എഐയുടെ പ്രവർത്തനം.
ദൈനംദിന മൊബൈൽ ഉപയോഗത്തിൽ ഇത് മാറ്റങ്ങൾ കൊണ്ടുവരുമെന്ന് സാംസങ് പറയുന്നു. ഒപ്പം സുരക്ഷയും സ്വകാര്യതയും കമ്പനി വാഗ്ദാനം ചെയ്യുന്നു.
എഐ ലൈവ് ട്രാൻസ്ലേറ്റ് കോൾ എന്ന ഫീച്ചർ വഴി ഫോൺ കോളുകൾ തത്സമയം തർജ്ജമ ചെയ്യാനാകും. സാംസങിന്റെ ഫോൺ ആപ്പിലാണ് ഈ സംവിധാനം ഒരുക്കിയിട്ടുള്ളത്. ഉപഭോക്താവ് സംസാരിക്കുന്നതിന്റെ തർജ്ജമ ടെക്സ്റ്റ് ആയും ശബ്ദമായും തത്സമയം നിർമിക്കപ്പെടും.
അടുത്തവർഷം ആദ്യം ഗാലക്സി എഐ ഫോണുകളിലെത്തുമെന്ന് കമ്പനി പറഞ്ഞു. 2024-ൽ പുറത്തിറക്കുന്ന സാംസങ് ഗാലക്സി എസ് 24 സ്മാർട്ഫോണുകളിൽ ഗാലക്സി എഐ ഉൾപ്പെടുത്തിയേക്കും. ഈ ആഴ്ച നടന്ന ഒരു പരിപാടിയിൽ, സാംസങ് തങ്ങൾ വികസിപ്പിച്ച ഗോസ് (Gauss) എന്ന ജനറേറ്റീവ് എഐ മോഡലും പരിചയപ്പെടുത്തിയിരുന്നു. ഇതും ഗാലക്സി എസ്24 ഫോണുകളിൽ അവതരിപ്പിച്ചേക്കും.
