വീതികുറഞ്ഞ റോഡിൽ കാർ പാർക്ക് ചെയ്യുന്നതുമായി ബന്ധപ്പെട്ടുണ്ടായ തർക്കത്തെ തുടർന്ന് യുവാവിനെ യുവാക്കളുടെ സംഘം വെട്ടി പരുക്കേൽപ്പിച്ചു. തടയാൻ ശ്രമിച്ച മാതാപിതാക്കൾക്കും പരുക്കേറ്റു.
പേരൂർ എംഎച്ച് കോളനിയിലെ താമസക്കാരായ അനൂപ് (32), അച്ഛൻ രാജൻ (56), അമ്മ കുഞ്ഞുമോൾ (54) എന്നിവർക്കാണ് പരുക്കേറ്റത്. മൂവരെയും മെഡിക്കൽ കോളജ് ആശുപത്രിയിൽ പ്രവേശിപ്പിച്ചു.
രാജന്റെ കാലിനും കുഞ്ഞുമോളുടെ കൈയ്ക്കുമാണ് പരിക്ക്, അനൂപിന്റെ തലയിലാണ് വെട്ടേറ്റത്. ഇന്നലെ രാത്രി 8.45നാണു സംഭവം.
വീട്ടിലേക്കു പരിചയക്കാരന്റെ കാറിൽ എത്തിയതാണ് അനൂപ്. വീടിനു മുന്നിലെ വീതികുറഞ്ഞ റോഡരികിൽ കാർ പാർക്ക് ചെയ്ത ശേഷം അനൂപ് ഇറങ്ങി. പിന്നാലെ എത്തിയ ബൈക്ക് യാത്രക്കാരായ 2 യുവാക്കൾക്കു മുന്നോട്ടുപോകാൻ സ്ഥലമില്ലായിരുന്നു.
യുവാക്കൾ ഇതു ചോദ്യം ചെയ്തതോടെ, കാർ കാർ ഓടിച്ചിരുന്ന ആൾ ബൈക്ക് യാത്രക്കാർക്കു പോകാൻ സൗകര്യം ഒരുക്കിക്കൊടുത്തു. ബൈക്ക് കാറിനെ മറികടക്കുന്നതിനിടെ യുവാക്കൾ അസഭ്യം പറഞ്ഞത് അനൂപ് ചോദ്യം ചെയ്തതാണ് ആക്രമണത്തിൽ കലാശിച്ചത്.
ആക്രമണത്തിനു പിന്നിൽ കഞ്ചാവു സംഘമാണെന്നാണ് ആരോപണം
