ഇറാനിൽ യുഎസ് നടത്തിയ ആക്രമണത്തിൽ ഒരു ആണവകേന്ദ്രത്തിന് മാത്രമാണ് കാര്യമായ കേടുപാടുകൾ സംഭവിച്ചതെന്ന് റിപ്പോർട്ട്. മൂന്ന് ആണവകേന്ദ്രങ്ങളെ ലക്ഷ്യമിട്ടാണ് യുഎസ് ആക്രമണം നടത്തിയിരുന്നത്. എന്നാൽ ഇവ പൂർണമായും തകർക്കാൻ സാധിച്ചിട്ടില്ലെന്നാണ് യുഎസ്സിന്റെ വിലയിരുത്തലെന്ന് എൻബിസി ന്യൂസ് റിപ്പോർട്ട് ചെയ്യുന്നു.
ഇറാന്റെ ആണവകേന്ദ്രങ്ങളായ നതാൻസ്, ഇസ്ഫഹാൻ, ഫോർദോ എന്നിവിടങ്ങളിലാണ് യുഎസ് ആക്രമണം നടത്തിയത്. ഇതിൽ ഫോർദോ ആണവകേന്ദ്രം മാത്രമാണ് തകർക്കപ്പെട്ടതെന്നും നതാൻസ്, ഇസ്ഫഹാൻ ആണവകേന്ദ്രങ്ങൾക്ക് കാര്യമായ കേടുപാടുകൾ സംഭവിച്ചിട്ടില്ലെന്നുമാണ് റിപ്പോർട്ടിൽ പറയുന്നത്. മുതിർന്ന യുഎസ് ഉദ്യോഗസ്ഥരെ ഉദ്ധരിച്ച് എൻബിസി ന്യൂസാണ് വാർത്ത റിപ്പോർട്ട് ചെയ്തത്.
കാര്യമായ കേടുപാടുകൾ സംഭവിക്കാത്തതിനാൽ നതാൻസ്, ഇസ്ഫഹാൻ ആണവകേന്ദ്രങ്ങളിൽ ഇറാന് ആണവസമ്പുഷ്‌ടീകരണം പുനരാരംഭിക്കാൻ സാധിക്കുമെന്നും റിപ്പോർട്ടിൽ പറയുന്നു. ഇറാന് വേണമെങ്കിൽ അടുത്ത മാസങ്ങളിൽ തന്നെ ഇത് തുടങ്ങാനാകുമെന്നാണ് വിലയിരുത്തൽ. റിപ്പോർട്ടിനെ സംബന്ധിച്ച് വൈറ്റ്ഹൗസ് പ്രതികരിച്ചിട്ടില്ല.
നേരത്തേ ഒരു ഇസ്രയേൽ ഉദ്യോഗസ്ഥനും സമാനമായ പ്രതികരണം നടത്തിയിരുന്നു. അമേരിക്ക ആക്രമണം നടത്തിയെങ്കിലും ഇസ്ഫഹാൻ ആണവകേന്ദ്രത്തിലെ സമ്പുഷ്ടീകരിച്ച യുറേനിയം ഇറാന് വീണ്ടെടുക്കാൻ സാധിക്കുമെന്നായിരുന്നു പ്രതികരണം. എന്നാൽ യുറേനിയം വീണ്ടെടുക്കാനുള്ള ശ്രമം നടത്തിയാൽ ആക്രമിക്കുമെന്ന മുന്നറിയിപ്പും അദ്ദേഹം നൽകിയിരുന്നു.
