സാധാരണക്കാരുടെ കുടുംബ ബജറ്റിനെ പൊള്ളിക്കുന്ന തക്കാളി വിറ്റ് കോടീശ്വരനായി ആന്ധ്ര പ്രദേശിലെ കർഷകൻ. ചിറ്റൂർ ജില്ലയിൽ നിന്നുള്ള തക്കാളി കർഷകനായ ചന്ദ്രമൗലി സ്വന്തം തോട്ടത്തിൽനിന്നു വലിയ നേട്ടം കിട്ടിയതിന്റെ സന്തോഷത്തിലാണ്.
തക്കാളി വിറ്റ് 45 ദിവസം കൊണ്ട് 4 കോടി രൂപയാണു കർഷകൻ നേടിയത്. ഒരുകോടിയാണു തന്റെ മുടക്കുമുതലെന്നും നാലുകോടി വരുമാനം കിട്ടിയെന്നും മൂന്നു കോടി ലാഭമാണെന്നും ചന്ദ്രമൗലി പറഞ്ഞു. 45 ദിവസം കൊണ്ട് 40,000 പെട്ടി തക്കാളിയാണ് വിറ്റത്. 22 ഏക്കർ തോട്ടത്തിലായിരുന്നു കൃഷി.
ഏപ്രിൽ ആദ്യം വ്യത്യസ്ത ഇനത്തിലുള്ള തക്കാളി വിത്തുകൾ പാകി. കൃത്യമായ പരിചരണം നൽകിയതോടെ ജൂൺ അവസാനത്തോടെ മികച്ച തക്കാളിപ്പാടം ഉണ്ടാക്കിയെടുക്കാൻ ചന്ദ്രമൗലിക്ക് കഴിഞ്ഞു. കർണാടകയിലെ കോലാർ മാർക്കറ്റിലാണ് തക്കാളി വിറ്റത്. 15 കിലോയുടെ തക്കാളിപ്പെട്ടിക്ക് 1,000 മുതൽ 1,500 വരെയായിരുന്നു വില.
