ഉത്തർപ്രദേശിലെ മുസാഫർ നഗറിലെ നേഹ പബ്ലിക് സ്കൂളിലെ അധ്യാപിക ഹിന്ദു വിദ്യാർഥികളെക്കൊണ്ട് മുസ്ലിം വിദ്യാർഥിയെ മർദിച്ച സംഭവത്തിന്റെ വിഡിയോ ബ്ലോക് ചെയ്യാൻ എക്സ് (ട്വിറ്റർ) പ്ലാറ്റ്ഫോമിന് സർക്കാർ അടിയന്തര ഉത്തരവ് നൽകിയെന്ന അവകാശവാദവുമായി കോൺഗ്രസ്. സംഭവവുമായി ബന്ധപ്പെട്ട യുആർഎല്ലുകളും ഹാഷ്ടാഗും തടയാനും സർക്കാർ നിർദേശം നൽകിയതായി കോൺഗ്രസ് നേതാവ് സുപ്രിയ ശ്രീനേറ്റ് പറഞ്ഞു.
തൃപ്ത ത്യാഗി എന്ന അധ്യാപിക മുസ്ലിം വിദ്യാർഥിയെ മർദിക്കാൻ മറ്റുകുട്ടികളോട് ആവശ്യപ്പെടുന്നതാണ് വിഡിയോ. ദൃശ്യങ്ങൾ സമൂഹമാധ്യമങ്ങളിൽ വൈറലായതിനു പിന്നാലെ, അധ്യാപികയ്ക്കെതിരെ വിമർശനം ഉയർന്നിരുന്നു. പിന്നാലെ വിശദീകരണവുമായി തൃപ്ത ത്യാഗി രംഗത്തെത്തി. താൻ ഭിന്നശേഷിക്കാരിയാണെന്നും ആ കുട്ടി കഴിഞ്ഞ് 2 മാസമായി ഗൃഹപാഠം ചെയ്യുന്നില്ലെന്നും തനിക്ക് എഴുന്നേൽക്കാൻ കഴിയാത്തതിനാൽ, മറ്റുകുട്ടികളെകൊണ്ട് തല്ലു നൽകിയതാണെന്നുമായിരുന്നു വിശദീകരണം.
അധ്യാപികയ്ക്കെതിരെ നടപടിയെടുക്കണമെന്ന് വിവിധകോണുകളിൽ നിന്ന് പ്രതിഷേധം ഉയർന്നതിനു പിന്നാലെ, സംഭവത്തിൽ സ്കൂൾ പ്രിൻസിപ്പലിനോട് വിശദീകരണം തേടിയതായും അധ്യാപികയ്ക്കെതിരെ നടപടിയെടുക്കാൻ വിദ്യാഭ്യാസവകുപ്പിന് നിർദേശം നൽകിയതായും പൊലീസ് അറിയിച്ചു. തന്റെ മകനെ ഈ സ്കൂളിലേക്ക് ഇനി അയയ്ക്കില്ലെന്ന് കുട്ടിയുടെ പിതാവ് വ്യക്തമാക്കി.
