പെരുമണ്ണയിൽ വീടിൻ്റെ ടെറസിൽ കഞ്ചാവുചെടി വളർത്തിയ യുവാവ് അറസ്റ്റിൽ. പെരിങ്ങത്തുപറമ്പ് ഷെഫീഖ് (29) എന്ന ആളെയാണ് പോലീസ് അറസ്റ്റ് ചെയ്‌തത്‌. വാടകയ്ക്ക് താമസിച്ചിരുന്ന വീടിൻ്റെ ടെറസിലാണ് ഇയാൾ കഞ്ചാവ് ചെടി വളർത്തിയിരുന്നത്.
ഏകദേശം 240 സെൻ്റിമീറ്റർ പൊക്കമുള്ള, പൂർണവളർച്ചയെത്തിയ കഞ്ചാവ് ചെടിയാണ് ഷെഫീറിൻ്റെ ടെറസിൽനിന്ന് കണ്ടെത്തിയതെന്ന് പോലീസ് വ്യക്തമാക്കി. രഹസ്യവിവരം ലഭിച്ചതിൻ്റെ അടിസ്ഥാനത്തിലാണ് ഡാൻസാഫ് സംഘവും നടക്കാവ് പോലീസും ചേർന്ന് വീട്ടിൽ പരിശോധനയ്ക്ക് എത്തിയത്.
പോലീസ് പരിശോധന നടത്തുന്നതിനിടെ ഷെഫീഖ് വീട്ടിൽനിന്ന് ഇറങ്ങി ഓടി രക്ഷപ്പെടാൻ ശ്രമിച്ചിരുന്നു. എന്നാൽ, പോലീസ് ഇയാളെ പിടികൂടുകയായിരുന്നു. കസ്റ്റഡിയിലെടുത്ത ഷെഫീഖിനുമേൽ എൻഡിപിഎസ് നിയമപ്രകാരമാണ് കേസെടുത്തിട്ടുള്ളത്.
