കെഎസ്ആർടിസി സർവീസുകളുടെ എണ്ണം വീണ്ടും പകുതിയായി കുറച്ചു. ജീവനക്കാർക്ക് കൊവിഡ് ബാധിച്ചതും യാത്രക്കാരുടെ എണ്ണം ഗണ്യമായി കുറഞ്ഞതും മൂലമുള്ള നഷ്ടവും കണക്കിലെടുത്താണ് സർവീസുകൾ കുറച്ചത്. തിരുവനന്തപുരം സോണിൽ മാത്രം 491 ജീവനക്കാരാണ് കൊവിഡ് ചികിത്സയിലും ക്വാറന്റീനിലുമുള്ളത്. തിരുവനന്തപുരം, പത്തനംതിട്ട ജില്ലകളിലായി ചികിത്സയിലുള്ള 314 പേരിൽ 213 പേരും ഡ്രൈവറും കണ്ടക്‌റുമാണ്. 117 പേർ ക്വാറന്റീനിലും.
വരുമാനത്തിലും വലിയ കുറവാണ് ഉണ്ടായിരിക്കുന്നത്. ലോക്ഡൗൺ ഉള്ള ഞായറാഴ്ച കെഎസ്ആർടിസിക്ക് വന്ന വരുമാനം 44 ലക്ഷം രൂപയാണ്. പക്ഷെ ചെലവാവട്ടെ 59 ലക്ഷം രൂപയാണ്. തിങ്കളാഴ്ച 3074 സർവീസിന് കിട്ടിയത് 2 കോടി 45 ലക്ഷം രൂപയാണ്. ഇതിൽ ഒരു കോടി 61 ലക്ഷവും ഡീസലിന് പോയി.ഇനി തിങ്കൾ മുതൽ വെള്ളിവരെ സർവീസുകൾ 1500 ആയും ശനി, ഞായർ ദിവസങ്ങളിൽ 650 ആയും ചുരുക്കും. യാത്രക്കാർ തീരെയില്ലാത്തവ 11 മണി മുതൽ മൂന്ന് മണിവരെ നിർത്തി വെക്കും.
