ഐപിഎഎല്ലിലെ രണ്ടാം ക്വാളിഫയറിൽ മുംബൈ ഇന്ത്യൻസിനെ തകർത്ത് പഞ്ചാബ് കിങ്സ് ഫൈനലിൽ. അഞ്ച് വിക്കറ്റിനാണ് പഞ്ചാബ് മുംബൈയെ പരാജയപ്പെടുത്തിയത്. മുംബൈ ഉയർത്തിയ 204 റൺസിന്റെ വിജയലക്ഷ്യം ഒരോവർ ശേഷിക്കെ പഞ്ചാബ് മറികടന്നു. അഞ്ച് വിക്കറ്റ് നഷ്ട‌ത്തിൽ 207 റൺസാണ് പഞ്ചാബ് നേടിയത്. ചൊവ്വാഴ്‌ച നടക്കുന്ന ഫൈനലിൽ റോയൽ ചലഞ്ചേഴ്‌സ്‌ ബെംഗളൂരുവാണ് പഞ്ചാബിന്റെ എതിരാളികൾ. ഇരുടീമുകളും ഇതുവരെ ഐപിഎൽ കിരീടം നേടിയിട്ടില്ലാത്തതിനാൽ ഇത്തവണ പുതിയൊരു ചാമ്പ്യൻ്റെ പിറവിക്കാകും ക്രിക്കറ്റ് പ്രേമികൾ സാക്ഷ്യം വഹിക്കുക.

മഴ വില്ലനായെത്തിയതിനാൽ രണ്ടരമണിക്കൂർ വൈകിയാണ് രണ്ടാം ക്വാളിഫയർ മത്സരം ആരംഭിച്ചത്. ആദ്യം ബാറ്റുചെയ്‌ത മുംബൈ നിശ്ചിത 20 ഓവറിൽ ആറ് വിക്കറ്റ് നഷ്ട‌ത്തിൽ 203 റൺസെടുത്തു. വെടിക്കെട്ടോടെ ബാറ്റിങ് ആരംഭിച്ച മുംബൈക്ക് മൂന്നാം ഓവറിൽ രോഹിത് ശർമയെ നഷ്‌ടമായി. എട്ട് റൺസ് മാത്രമാണ് താരത്തിന് നേടാനായത്. രണ്ടാം വിക്കറ്റിൽ ജോണി ബെയർസ്റ്റോയും തിലക് വർമയും തകർത്തടിച്ചതോടെ മുംബൈ സ്കോർ കുതിച്ചു. ടീം അഞ്ചോവറിൽ അമ്പതിലെത്തി. പവർ പ്ലേ അവസാനിക്കുമ്പോൾ 65-1 എന്ന നിലയിലായിരുന്നു മുംബൈ. ബെയർസ്‌റ്റോ ആയിരുന്നു കൂടുതൽ അപകടകാരി.

എന്നാൽ ടീം സ്കോർ 70-ൽ നിൽക്കേ ബെയർസ്‌റ്റോ പുറത്തായി. 24 പന്തിൽ നിന്ന് 38 റൺസെടുത്താണ് താരം മടങ്ങിയത്. എന്നാൽ മൂന്നാം വിക്കറ്റിൽ ഒന്നിച്ച തിലക് വർമയും സൂര്യകുമാർ യാദവും വെടിക്കെട്ടൊരുക്കിയതോടെ മുംബൈ പത്തോവറിൽ നൂറുകടന്നു. 13 ഓവർ അവസാനിക്കുമ്പോൾ 131-2 എന്ന നിലയിലായിരുന്നു ടീം. എന്നാൽ യൂര്യകുമാറിനെ പുറത്താക്കി ചാഹൽ പഞ്ചാബിന് പ്രതീക്ഷ നൽകി. 26 പന്തിൽ നിന്ന് 44 റൺസെടുത്താണ് സൂര്യകുമാർ കൂടാരം കയറിയത്. പിന്നാലെ തിലകും പുറത്തായതോടെ മുംബൈ 142-4 എന്ന നിലയിലായി. 29 പന്തിൽ നിന്ന് 44 റൺസാണ് തിലകിന്റെ സമ്പാദ്യം.ഹാർദിക് പാണ്ഡ്യ(15), നമാൻ ധിർ(37) എന്നിവരുടെ ഇന്നിങ്സുകൾ മുംബൈയെ 200-നടുത്തെത്തിച്ചു. ഒടുക്കം നിശ്ചിത 20 ഓവറിൽ ആറ് വിക്കറ്റ് നഷ്ട‌ത്തിൽ മുംബൈ 203 റൺസെടുത്തു. മറുപടി ബാറ്റിങ്ങിനിറങ്ങിയ പഞ്ചാബിനായി ക്യാപ്റ്റൻ ശ്രേയസ് അയ്യർ പുറത്താകാതെ 87 റൺസെടുത്തു.

ശ്രേയസ്സിൻ്റെ ഇന്നിങ്സാണ് പഞ്ചാബിന്റെ വിജയത്തിന് നെടുംതൂണായത്. നെഹൽ വധേര (48), ജോഷ് ഇൻഗ്ലിസ് (38) എന്നിവരും ടീമിനായി മികച്ച പ്രകടനം കാഴ്ചവെച്ചു.