രണ്ടു വർഷത്തെ നിയന്ത്രണങ്ങൾക്കു ശേഷം ഭക്തിയുടെ ഉത്സവമേളത്തിമർപ്പിൽ ഏറ്റുമാനൂരപ്പന്റെ തിരുസന്നിധിയിൽ ഏഴരപ്പൊന്നാന ദർശനം നാളെ നടക്കും.
എട്ടാം ഉത്സവമായ നാളെ രാത്രി 11ന് ആസ്ഥാനമണ്ഡപത്തിലാണ് ഏഴരപ്പൊന്നാന ദർശനം. കഴി‍ഞ്ഞ വർഷങ്ങളിൽ കോവിഡ് നിയന്ത്രണം ഉള്ളതിനാൽ പാസ് ഉപയോഗിച്ചായിരുന്നു ദർശനം.
ഇക്കുറി നിയന്ത്രണം ഒഴിവാക്കിയെങ്കിലും പടിഞ്ഞാറേ നടയിലെ മൈതാനത്തു പൊലീസ് പ്രത്യേകം സജ്ജമാക്കുന്ന ബാരിക്കേഡിലൂടെ തന്നെയാവും ഭക്തരെ ക്ഷേത്രത്തിലേക്കു പ്രവേശിപ്പിക്കുക.
രാത്രി 11നു വിളക്കുകളുടെയും കർപ്പൂര ദീപങ്ങളുടെയും പൊൻപ്രഭയിൽ ദർശനത്തിന് ആസ്ഥാനമണ്ഡപ നട തുറക്കും. മുൻവർഷങ്ങളിൽ രാത്രി 12നായിരുന്നു ദർശനം. നട തുറക്കുന്നതോടെ മണ്ഡപത്തിനു മുൻപിൽ സ്ഥാപിച്ച ചെമ്പിൽ കഴകക്കാർ പൊന്നിൻകുടം വയ്ക്കും.
ചെങ്ങന്നൂർ പൊന്നുരുട്ടു മഠത്തിലെ പ്രതിനിധി ആദ്യകാണിക്ക അർപ്പിക്കും. തുർന്നാണു ഭക്തർ കാണിക്കയർപ്പിച്ച് ഏറ്റുമാനൂരപ്പനെ വണങ്ങുന്നത്.
പുലർച്ചെ ഒന്നു മുതൽ എഴുന്നള്ളത്ത്. തുടർന്ന് ഭക്തർക്കു കാണിക്ക അർപ്പിക്കുന്നതിനു സ്വർണക്കുടം കൊടിമരച്ചുവട്ടിൽ ഇറക്കി എഴുന്നള്ളിക്കും.
സുരക്ഷാ ക്രമീകരണങ്ങൾക്കായി പൊലീസിനെ നിയോഗിച്ചെന്നു ജില്ലാ പൊലീസ് മേധാവി ഡി.ശിൽപ അറിയിച്ചു. ക്യാമറ നിരീക്ഷണം ഉണ്ടാവും. കൺട്രോൾ റൂം ക്രമീകരിച്ചു.
