ഏറ്റുമാനൂരിൽ സീറ്റ് നിഷേധിച്ചതിനെ ചൊല്ലി പരസ്യ പ്രതിഷേധം നടത്തിയ ലതികാ സുഭാഷിനെ അനുനയിപ്പിക്കാനുള്ള ശ്രമം പരാജയം. കേരളാ കോൺഗ്രസ് ജോസഫ് വിഭാഗം സ്ഥാനാർത്ഥി പ്രിൻസ് ലൂക്കോസ് ലതിക സുഭാഷുമായി കൂടിക്കാഴ്ച നടത്തി. യുഡിഎഫിനെ ദുർബലപ്പെടുത്തരുതെന്ന് പ്രിൻസ് ലൂക്കോസ് ലതിക സുഭാഷിനോട് അഭ്യർത്ഥിച്ചുവെങ്കിലും വൈകിപ്പോയെന്ന് ലതിക സുഭാഷ് മറുപടി നൽകി. കോൺഗ്രസ് അധ്യക്ഷ പദവി രാജിവച്ച് തല മുണ്ഡനം ചെയ്തതിൽ ഒതുങ്ങില്ല ലതിക സുഭാഷിന്റെ പ്രതിഷേധം. ഏറ്റുമാനൂരിൽ സ്വതന്ത്ര സ്ഥാനാർത്ഥി ആകാനാണ് നീക്കം. വൈകീട്ട് ഇതുസംബന്ധിച്ച പ്രഖ്യാപനമുണ്ടാകും.
പകരം സീറ്റോ മറ്റ് സ്ഥാനമാനങ്ങളോ കാട്ടിയുള്ള മുതിർന്ന കോൺഗ്രസ് നേതാക്കളുടെ അനുനയ നീക്കങ്ങൾ ലതിക നിരസിച്ചു. ഇനി ചർച്ചയ്ക്ക് പ്രസക്തിയില്ലെന്നും പരസ്യ പ്രതികരണം. ഇതിനിടെ യുഡിഎഫിനെ ദുർബലപ്പെടുത്തുന്ന നടപടി ഒഴിവാക്കണമെന്ന് അഭ്യർത്ഥിച്ച് ഏറ്റുമാനൂരിലെ യുഡിഎഫ് സ്ഥാനാർത്ഥി പ്രിൻസ് ലൂക്കോസ് ലതികയെ സന്ദർശിച്ചു. വൈകിപ്പോയി എന്നായിരുന്നു ലതികയുടെ മറുപടി. രാവിലെ കോട്ടയത്ത് എത്തിയത് മുതൽ പ്രാദേശിക കോൺഗ്രസ് നേതാക്കൾ പിന്തുണയുമായി ലതികയുടെ വീട്ടിലെത്തുന്നുണ്ട്.
