അന്താരാഷ്ട്ര ബഹിരാകാശ നിലയത്തിൽ നിന്ന് പകർത്തിയ മനോഹരമായ അറോറയുടെ (ധ്രുവ ദീപ്തി) ചിത്രം പുറത്തുവിട്ട് നാസ. അമേരിക്കൻ സംസ്ഥാനമായ യുട്ടായുടെ മുകളിലൂടെ സഞ്ചരിക്കുന്നതിനിടയിലാണ് ഈ ചിത്രം പകർത്തിയത്. ഭൂമിയുടെ ധ്രുവമേഖലയിലുടനീളം രാത്രിയിൽ ദൃശ്യമാകുന്ന പ്രകാശത്തെയാണ് ധ്രുവദീപ്തിയെന്ന് വിളിക്കുന്നത്.
സൂര്യനിൽ നിന്നുവരുന്ന ഉയർന്ന ചാർജുള്ള കണങ്ങൾ ഭൂമിയുടെ അന്തരീക്ഷത്തിലേക്ക് കടക്കുമ്പോഴാണ് ധ്രുവദീപ്തി പ്രത്യക്ഷപ്പെടുന്നത്. അന്തരീക്ഷത്തിലേക്ക് കടക്കുന്ന കണങ്ങൾ വാതക തന്മാത്രകളുമായി കൂട്ടിയിടിച്ച് ഫോട്ടോണുകൾ പുറത്തുവിടുമ്പോഴാണ് ആകാശം വർണാഭമായി കാണപ്പെടുന്നത്. ധ്രുവദീപ്തിയുടെ നിറം സൗരകണികകൾ ഏത് വാതക തന്മാത്രകളുമായാണ് കൂട്ടിയിടിക്കുന്നത് എന്നതിനെ ആശ്രയിച്ചിരിക്കും. പച്ച, ചുവപ്പ് നിറങ്ങളിലാണ് സാധാരണ കാണുന്നത്.
എന്നാൽ ബഹിരാകാശത്ത് നിന്ന് ധ്രുവദീപ്തി കാണുക എന്നത് വളരെ ചുരുക്കം ചിലയാളുകൾക്ക് മാത്രമേ സാധിക്കുകയുള്ളൂ. ബഹിരാകാശ സഞ്ചാരികൾക്ക്. ഭൂമിയിൽ, ഗ്രീൻലാൻഡ്, നോർവേ, സ്വീഡൻ, ഫിൻലൻഡ് ഉൾപ്പടെയുള്ള വിവിധയിടങ്ങളിൽ നിന്ന് സാധാരണ പ്രകൃതി പ്രതിഭാസമായി ധ്രുവദീപ്തി കാണാനാവും. ദക്ഷിണാർധഗോളത്തിലുള്ളവരാണെങ്കിൽ ഓസ്ട്രേലിയയിലെ ടാസ്മാനിയിൽ നിന്നും ന്യൂസിലാൻഡിലെ ചിലയിടങ്ങളിൽ നിന്നും ധ്രുവദീപ്തി കാണാം.
