ഭർത്താവ് യൂട്യൂബ് നോക്കി പഠിച്ച് പ്രസവമെടുക്കാൻ ശ്രമിച്ചതിനെ തുടർന്ന് തമിഴ്നാട്ടിൽ യുവതി മരിച്ചു. വേദനയെ തുടർന്ന് അവശയായ സ്ത്രീയെ ആശുപത്രിയിൽ എത്തിക്കുന്നതിനു പകരം ഇയാൾ വീട്ടിൽ വെച്ചു തന്നെ പ്രസവമെടുക്കാൻ ശ്രമിക്കുകയായിരുന്നു. യൂട്യൂബിൽ പ്രസവ വീഡിയോ നോക്കിയായിരുന്നു ഇയാളുടെ “പരിചരണം.
പൊക്കിൾക്കൊടി ശരിയായി മുറിക്കാത്തതിനെ തുടർന്നുണ്ടായ രക്തസ്രാവത്തെ തുടർന്നാണ് യുവതി മരണപ്പെട്ടത്. തമിഴ്നാട്ടിലെ കൃഷ്ണഗിരിയിലാണ് സംഭവം. ലോകനായകി(27) എന്നാണ് മരിച്ച യുവതിയുടെ പേര്. ഇവരുടെ ഭർത്താവ് മാധേഷിനെതിരെ പരാതി നൽകിയതായി പ്രാഥമികാരോഗ്യ കേന്ദ്രത്തിലെ മെഡിക്കൽ ഓഫീസർ രാധിക അറിയിച്ചു.
കൃഷ്ണഗിരിയിലെ പോച്ചംപള്ളിക്ക് സമീപം പുളിയംപട്ടി സ്വദേശികളാണ് ലോകനായകിയും മാധേഷും. ലോകനായകിക്ക് പ്രസവവേദന അനുഭവപ്പെട്ടതോടെ മാധേഷ് യൂട്യൂബിൽ കണ്ട് പഠിച്ചതു പ്രകാരം പ്രസവമെടുക്കുകയായിരുന്നു. കുഞ്ഞ് പുറത്തുവന്നതിനു ശേഷം പൊക്കിൾകൊടി ശരിയായി മുറിക്കാത്തതിനെ തുടർന്ന് രക്തസ്രാവമുണ്ടാകുകയായിരുന്നു.
രക്തസ്രാവം അമിതമായതോടെ പ്രാഥമികരോഗ്യ കേന്ദ്രത്തിലേക്ക് ലോകനായകിയെ എത്തിച്ചെങ്കിലും ജീവൻ രക്ഷിക്കാനായില്ല.
