ഇന്ത്യയിലും ജപ്പാനിലും ജനറേറ്റീവ് എഐ അവതരിപ്പിച്ച് ഗൂഗിൾ. സെർച്ച് ചെയ്യുമ്പോൾ AI സഹായം ലഭിക്കുമെന്നതാണ് പുതിയ ഫീച്ചറിന്റെ പ്രത്യേകത. അമേരിക്കയിലാണ് ആദ്യമായി ഈ ഫീച്ചർ അതവരിപ്പിച്ചത്. ഉപയോക്താക്കൾക്ക് ഇത് ഉപയോഗിക്കണോ വേണ്ടയോ എന്ന് തീരുമാനിക്കാനുള്ള അവസരമുണ്ട്. പുതിയ ഫീച്ചർ ഇന്ത്യയിലെ ഉപയോക്താക്കൾക്ക് ലഭ്യമായി തുടങ്ങി. സേർച്ച് ചെയ്യുന്ന കാര്യങ്ങളുടെ സംഗ്രഹം ഉൾപ്പടെ, നിർദേശങ്ങൾക്ക് അനുസരിച്ച് ടെക്സ്റ്റ് ആയും ചിത്രങ്ങളായും ഓഡിയോ ആയുമെല്ലാം വിവരങ്ങൾ കാണിക്കുന്ന ഫീച്ചറാണിത്.
ജാപ്പനീസ് ഉപയോക്താക്കൾക്ക് അവരുടെ പ്രാദേശിക ഭാഷകളിൽ ഈ ഫീച്ചർ ഉപയോഗിക്കാൻ കഴിയും. അതേസമയം ഇന്ത്യയിൽ ഈ ഫീച്ചർ ഇംഗ്ലീഷിലും ഹിന്ദിയിലും ലഭ്യമാകും. ഗൂഗിളിന്റെ ചാറ്റ്ബോട്ടായ ബാർഡിൽ നിന്ന് വ്യത്യസ്തമാണ് ഈ ഫീച്ചർ.
സെർച്ച് ലാബുകൾ വഴി സൈൻ അപ്പ് ചെയ്ത എല്ലാ ഉപയോക്താക്കൾക്കും ഗൂഗിൾ ക്രോമിലും ആപ്പിലും എഐ സേർച്ച് സേവനം ലഭിക്കും. ജനറേറ്റീവ് എഐ ഫീച്ചർ കൂടി എത്തുന്നതോടെ സെർച്ചിങ് ഓപ്ഷൻ കൂടുതൽ ലളിതവും എളുപ്പവുമാകും. ഗൂഗിളിന്റെ ക്രോം, ആപ്പ്, ഡെസ്ക്ടോപ്പ് എന്നിവയിലെ ലാബ്സ് എന്ന ഐക്കൺ ടാപ്പ് ചെയ്യുന്നതിലൂടെ ഉപയോക്താക്കൾക്ക് പുതിയ സേവനം ഉപയോഗപ്പെടുത്താം.
മൈക്രോസോഫ്റ്റിന്റെ ബിങ് ഐഐ സെർച്ച് ടൂളിന് സമാനമായ ഫീച്ചറാണ് ഗൂഗിൾ ജനറേറ്റീവ് എഐയിലൂടെ അവതരിപ്പിച്ചിരിക്കുന്നത്.
