ബോംബ് ഭീഷണിയെത്തുടർന്ന് ചെന്നൈ-മുംബൈ ഇൻഡിഗോ വിമാനം അടിയന്തരമായി നിലത്തിറക്കി. ഇൻഡിഗോയുടെ 6 ഇ 5314 വിമാനമാണ് അടിയന്തരമായി മുംബൈ വിമാനത്താവളത്തിൽ ഇറക്കിയത്.
ചെന്നൈയിൽനിന്ന് പറന്നുയർന്ന വിമാനം മുംബൈയിൽ ലാൻഡ് ചെയ്യാനൊരുങ്ങവെയായിരുന്നു ബോംബ് ഭീഷണി സന്ദേശം ലഭിച്ചത്. തുടർന്ന് ക്യാബിൻ ക്രൂ പ്രോട്ടോക്കോൾ പിന്തുടരുകയും വിമാനം സുരക്ഷാ നിർദേശങ്ങൾപ്രകാരം ഐസൊലേഷനിലാക്കുകയും ചെയ്‌തതായി വിമാനക്കമ്പനി അധികൃതർ പ്രസ്‌താവനയിൽ അറിയിച്ചു.
യാത്രക്കാർ എല്ലാവരും സുരക്ഷിതരാണെന്നും ഉടൻതന്നെ എല്ലാവരേയും വിമാനത്തിൽനിന്ന് ഒഴിപ്പിച്ചതായും അധികൃതർ അറിയിച്ചു. സുരക്ഷാ പരിശോധനകൾക്ക് ശേഷം വിമാനം ടെർമിനലിൽ എത്തിക്കുമെന്നും അധികൃതർ അറിയിച്ചു.
