പൊതുജനാഭിപ്രായത്തെ മാനിച്ച് ഡയലോഗുകളിൽ മാറ്റം വരുത്താൻ ഒരുങ്ങി ആദിപുരുഷ് ടീം. ലോകമെമ്പാടും മികച്ച പ്രതികരണം നേടുകയും എല്ലാ പ്രായത്തിലുമുള്ള പ്രേക്ഷകരുടെ ഹൃദയം കീഴടക്കുകയും ചെയ്തുവെങ്കിലും ഏറെ വിവാദങ്ങൾ സൃഷ്ട്ടിച്ച ചിത്രം കൂടിയാണ് ആദിപുരുഷ്. പല ഡയലോഗുകളും ഉചിതമല്ല എന്ന അഭിപ്പായമാണ് പൊതുവെ ഉയർന്നു വന്നത്. ഇതോടെ സിനിമയുടെ സംഭാഷണങ്ങളിൽ മാറ്റങ്ങൾ വരുത്താൻ ടീം തീരുമാനിക്കുകയായിരുന്നു.
“ഞങ്ങളുടെ ലക്ഷ്യം യഥാർത്ഥ നായകന്മാരെ നമ്മുടെ യുവതലമുറയ്ക്ക് അവതരിപ്പിക്കുക എന്നതായിരുന്നു. 5 ഡയലോഗുകൾക്ക് എതിർപ്പുണ്ട്, അവ മാറ്റും. ആളുകൾക്ക് ചില ഭാഗങ്ങൾ ഇഷ്ടപ്പെട്ടില്ലെങ്കിൽ, അത് പരിഹരിക്കേണ്ടത് ഞങ്ങളുടെ ഉത്തരവാദിത്തമാണ്”, സംഭാഷണ രചയിതാവ് മനോജ് മുൻതാഷിർ എൻഐഎയോട് പറഞ്ഞു.
ബോക്സ് ഓഫീസിൽ തടയാനാവാത്ത കളക്ഷനുണ്ടായിട്ടും ടീം പ്രതിജ്ഞാബദ്ധരാണെന്നും പ്രേക്ഷകരുടെ വികാരങ്ങൾക്കും ഐക്യത്തിനും അതീതമല്ലെന്നും ഈ തീരുമാനം സാക്ഷ്യപ്പെടുത്തുകയാണ്. ഏതൊക്കെ ഡയലോഗുകളാണ് ടീം പരിഷ്കരിച്ചതെന്ന് വ്യക്തമല്ല. ഓം റൗത്തിന്റെ ചിത്രം ആദിപുരുഷ് വെള്ളിയാഴ്ചയാണ് തിയറ്ററുകളിലെത്തിയത്. പ്രഭാസ്, കൃതി സനോൻ, സെയ്ഫ് അലി ഖാൻ, സണ്ണി സിംഗ്, ദേവദത്ത നഗെ എന്നിവർ പ്രധാന വേഷങ്ങളിൽ എത്തുന്നു.
അതേസമയം, ചിത്രം രണ്ടു ദിവസത്തിനുള്ളിൽ 200 കോടി ക്ലബിൽ കടന്നിരിക്കുകയാണ്. ഇതുവരെയായി 240 കോടിയാണ് പ്രഭാസ് ചിത്രം കളക്റ്റ് ചെയ്തിരിക്കുന്നത്. 500 കോടി നിർമ്മാണച്ചെലവുള്ള ചിത്രമാണ് ആദിപുരുഷ്. ഇന്ത്യൻ സിനിമയിൽ സമീപകാലത്ത് ഏറ്റവുമധികം കാത്തിരിപ്പ് ഉയർത്തി എത്തിയ ചിത്രമായിരുന്നു ആദിപുരുഷ്. രാമായണത്തെ ആസ്പദമാക്കിയുള്ള എപിക് മിത്തോളജിക്കൽ ചിത്രത്തിൽ ബാഹുബലി താരം പ്രഭാസ് ആണ് നായകനെന്നതും ചിത്രത്തിന്റെ വിപണിമൂല്യം വർധിപ്പിച്ച ഘടകമായിരുന്നു. ഇപ്പോൾ ചിത്രം റെക്കോർഡ് നേട്ടം സ്വന്തമാക്കിയിരിക്കുകയാണ്.
