ഗൂഗിളിന്റെ ഹെഡ് ഓഫിസിൽ ആടിന് എന്തുകാര്യം? ഒന്നല്ല, 200 ആടുകളെയാണ് ഗൂഗിൾ നിയമിച്ചിരിക്കുന്നത്. എന്തിനും ഉത്തരം നൽകുന്ന ഗൂഗിളിന്റെ ഒരു ചോദ്യത്തിനുള്ള മറുപടിയായിരുന്നു ഈ ആട്ടിൻകൂട്ടം. കാലിഫോർണിയയിലെ ഗൂഗിളിന്റെ ഹെഡ് ഓഫിസായ ഗൂഗിൾ പ്ലെക്സിലാണ് ഈ ആടുകൾ ജോലിക്കെത്തുന്നത്. ഗൂഗിൾ പ്ലെക്സിലെ നാച്വറൽ ‘ലോൺ മോവേഴ്സ്’ ആണ് ഈ ആടുകൾ. ഒരാഴ്ചയോളം ജോലി ചെയ്ത് ഇവർ മടങ്ങും. 26 ഏക്കറിലായി വ്യാപിച്ചുകിടക്കുന്ന ഗൂഗിളിന്റെ ഓഫിസ് മുറ്റത്തെ ‘പുല്ല് വെട്ടുന്നവരാണ് ഈ ആടുകൾ. 2009ൽ ഗൂഗിൾ ഓപ്പറേറ്റിങ് ഓഫിസർ അവരുടെ തന്നെ ബ്ലോഗിൽ എഴുതിയതാണ് ഈ സംഭവം.
ആ കഥയിങ്ങനെ… ഹരിതാഭയും പച്ചപ്പുമൊക്കെയുള്ള കാലിഫോർണിയയിലെ ഹെഡ് ഓഫിസായ ഗൂഗിൾ പ്ലെക്സ് കുന്നിൻചെരിവിന് സമാനമാണ്. പ്രകൃതിക്ക് ദോഷമില്ലാതെ, വലിയ ശബ്ദകോലാഹലമില്ലാതെ ഓഫിസിലെ പുൽമേടുകൾ എങ്ങനെ പരിപാലിക്കാം എന്ന ചോദ്യത്തിന് ഗൂഗിൾ കണ്ടെത്തിയ ഉത്തരമായിരുന്നു ആടിനെ മേയാൻ വിടാം. ഇരുന്നൂറിൽപരം ആടുകളാണ് ഗൂഗിളിന്റെ മുറ്റം വൃത്തിയാക്കാൻ കാലിഫോർണിയയിലെ ഓഫിസ് പരിസരത്ത് എത്തുന്നത്. കലിഫോർണിയ ഗ്രേസിങ് എന്ന കമ്പനിയിൽ നിന്ന് ഈ
ആടുകളെ ഗൂഗിൾ വാടകയ്ക്ക് എടുക്കുന്നത്.
പ്രകൃതിക്ക് കോട്ടംതട്ടാതെ, പെട്രോളും മറ്റ് ഇന്ധനങ്ങളും ചെലവാക്കാതെ, ശബ്ദകോലാഹലങ്ങളൊന്നുമില്ലാതെ ഞങ്ങൾ തോട്ടം പരിപാലിക്കുന്നത് ഇങ്ങനെയാണ്. ബ്ലോഗിൽ ഒരിക്കൽ കുറിച്ചതിങ്ങനെ. പുല്ല് തിന്നു തീർക്കുമ്പോൾ ഒരേ നിരപ്പിലാകില്ല എന്ന പോരായ്മ മാത്രമേ ഉണ്ടാകൂ. ആട്ടിൻപറ്റം മേയുന്നത് കൊണ്ട് ഇവയുടെ കാഷ്ടം വളമായി തീരുകയും ചെയ്യും. ആടുണ്ടെങ്കിൽ രണ്ടുണ്ട് കാര്യം എന്നാണ് ഗൂഗിളിന്റെ നിലപാട്.
26 ഏക്കറാണ് ഗൂഗിളിന്റെ ക്യാംപസ്. 2 മില്യൺ ചതുരശ്ര അടിയാണ് ഗൂഗിളിന്റെ ഓഫിസ്. ജുറാസിക് പാർക്കിന്റെ സൃഷ്ടാക്കളായ സിലിക്കോൺ ഗ്രാഫിക്സിൽ നിന്ന് 319 മില്യൺ ഡോളറിന് ഗൂഗിൾ വാങ്ങിയതാണ് ഈ സ്ഥലം. ക്ലൈവ് വിൽകിൻസൺ എന്ന സൗത്ത് ആഫ്രിക്കൻ ആർക്കിടെകറ്റ് ആണ് പരിസ്ഥിതിക്ക് യോജിച്ച രീതിയിൽ ഈ കെട്ടിടവും പരിസരവും ഡിസൈൻ ചെയ്തത്.
