സമാധാന കരാർ ധാരണയായതിന് പിന്നാലെ ഹോർമുസ് കടലിടുക്ക് തുറന്നതായി അമേരിക്കൻ പ്രസിഡന്റ് ഡോണൾഡ് ട്രംപ്. ഹോർമുസ് കടലിടുക്കിൽ കുടുങ്ങിക്കിടന്നിരുന്ന എണ്ണ നിറച്ച കപ്പലുകൾ പുറത്തേക്ക് നീങ്ങാൻ തുടങ്ങിയതായി ട്രംപ് പറഞ്ഞു. സുരക്ഷിതമായ തെക്കൻ പാതയിലൂടെയാണ് അവ കടന്നുപോകുന്നതെന്നും ട്രംപ് ട്രൂത്ത് സോഷ്യലിൽ കുറിച്ചു. ഇറാനുമായുള്ള കരാർ ഞായറാഴ്ച ഇലക്ട്രോണിക് മാർഗത്തിൽ ഒപ്പുവച്ചതായി അമേരിക്കൻ വൈസ് പ്രസിഡന്റ് ജെ ഡി വാൻസും അറിയിച്ചിട്ടുണ്ട്. കരാറിലെ ചട്ടങ്ങൾ ഇപ്പോൾ പ്രാബല്യത്തിലായെന്നും വാൻസ് പറഞ്ഞു.
എന്നാൽ ഹോർമുസ് കടക്കുന്ന കപ്പലുകളിൽ നിന്ന് മാരിടൈം സർവീസ് ഫീ ഇറാൻ ചുമത്തുമെന്നാണ് ഇറാൻ വിദേശകാര്യ മന്ത്രാലയം വ്യക്തമാക്കിയിരിക്കുന്നത്. എന്നാൽ ഹോർമുസ് തുറന്നതായും ‘ടോൾ ഫ്രീ’ ആയി സഞ്ചരിക്കാമെന്നുമാണ് ട്രംപിന്റെ ട്രൂത്ത് സോഷ്യൽ കുറിപ്പിൽ പ്രത്യേകം പരാമർശിച്ചിരിക്കുന്നത്. ഇക്കാര്യത്തിൽ ഇതുവരെയും വ്യക്തത വന്നിട്ടില്ല. ഹോർമുസ് കടലിടുക്ക് തുറന്നതിൽ എല്ലാവരേയും അഭിനന്ദിക്കുന്നതായും ട്രംപ് പറഞ്ഞിരുന്നു.
