കോഴിക്കോട് താമരശ്ശേരി ചുരത്തിൽ വലിയ മണ്ണിടിച്ചിൽ. ചുരം വഴിയുള്ള ഗതാഗതം പൂർണമായി തടസപ്പെട്ടു. വ്യൂ പോയിന്റിന് സമീപം മലയ്ക്ക് മുകളിൽ നിന്നും പാറയും മണ്ണും ഇടിഞ്ഞുവീഴുകയായിരുന്നുവെന്ന് ദൃക്‌സാക്ഷികൾ പറയുന്നു. ഫയർ ഫോഴ്‌സും സന്നദ്ധപ്രവർത്തകരും സ്ഥലത്തെത്തി മണ്ണ് നീക്കാനുള്ള ശ്രമങ്ങൾ ആരംഭിച്ചു. ചുരത്തിൽ വീണ്ടും മണ്ണിടിയുന്ന സാഹചര്യത്തിൽ വാഹനങ്ങൾ ഒരു കാരണവശാലും ചുരം കയറരുതെന്ന് പൊലീസ് അറിയിച്ചു.
ലക്കിടി കവാടത്തിന്റെ തൊട്ടടുത്താണ് അപകടമുണ്ടായത്. ജില്ലാ കളക്ടർ, എംഎൽഎ, ജില്ലാ പഞ്ചായത്ത് പ്രസിഡന്റ്, എഡിഎം എന്നിവരുൾപ്പെടെ സംഭവസ്ഥലത്തെത്തി സ്ഥിതിഗതികൾ വിലയിരുത്തി. ചുരത്തിലുണ്ടായത് വളരെ വലിയ മണ്ണിടിച്ചിലാണെന്നും പാറകൾ ഉൾപ്പെടെ നിലംപൊത്തിയത് ഗൗരവത്തോടെ കാണണമെന്നും ടി സിദ്ദിഖ് എംഎൽഎ പറഞ്ഞു. ഗതാഗതം ഇന്ന് പൂർണമായി പുനസ്ഥാപിക്കാൻ സാധ്യതയില്ല. കുടുങ്ങിയ വാഹനങ്ങൾക്ക് കടന്നുപോകാനുള്ള വഴിയൊരുക്കാൻ മാത്രമുള്ള പ്രവർത്തനങ്ങളാണ് നിലവിൽ നടന്നുവരുന്നത്. ചുരം താത്ക്കാലികമായി അടച്ചിട്ട് പാറകൾ പൂർണമായി പൊട്ടിച്ച് നീക്കുന്ന കാര്യത്തിൽ ഉൾപ്പെടെ നാളെ മാത്രമേ തീരുമാനമുണ്ടാകൂ.
