ജമ്മു കശ്‌മീരിലെ ബാരാമുള്ളയിൽ ബുധനാഴ്‌ച സൈന്യം 2 ഭീകരരെ വധിച്ചു. വാട്ടർഗാം മേഖലയിൽ സൈന്യം തിരച്ചിൽ നടത്തുന്നതിനിടെ ഒളിച്ചിരുന്ന ഭീകരർ വെടിയുതിർക്കുകയായിരുന്നു. ഏറ്റുമുട്ടലിൽ ഒരു പൊലീസുകാരനും ഒരു സൈനികനും പരുക്കേറ്റു. പ്രധാനമന്ത്രി നരേന്ദ്ര മോദി വ്യാഴാഴ്‌ച ശ്രീനഗർ സന്ദർശിക്കാനിരിക്കെയാണ് ബാരാമുള്ളയിലെ ഏറ്റുമുട്ടൽ.
അതിനിടെ, റെയ്‌സിയിൽ തീർഥാടകർ സഞ്ചരിച്ച ബസിന് നേരെയുണ്ടായ ഭീകരാക്രമണവുമായി ബന്ധപ്പെട്ട് ഒരാളെ അറസ്‌റ്റ് ചെയ്തെന്നു ജമ്മു പൊലീസ് അറിയിച്ചു. ഭീകരർക്ക് സഹായങ്ങൾ നൽകിയ രജൗരി സ്വദേശി ഹക്കിം ദിന്നാണ് അറസ്‌റ്റിലായതെന്നു ദേശീയ മാധ്യമങ്ങൾ റിപ്പോർട്ട് ചെയ്തു. ജമ്മു പൊലീസ് ഇയാളുടെ പേരുവിവരങ്ങൾ ഔദ്യോഗികമായി പുറത്തുവിട്ടിട്ടില്ല.
ജൂൺ 9ന് കത്രയിലെ വൈഷ്‌ണവദേവീ ക്ഷേത്രത്തിലേക്ക് പോകുകയായിരുന്ന തീർഥാടകർ സഞ്ചരിച്ച ബസിനുനേരെ ഭീകരർ വെടിയുതിർക്കുകയായിരുന്നു. സംഭവത്തിൽ 9 പേർ മരിക്കുകയും 41 പേർക്ക് പരുക്കേൽക്കുകയും ചെയ്തു.
