സനാതന ധർമത്തിനു മാത്രമേ ലോകത്ത് സമാധാനം ഉറപ്പ് നൽകാനാകു എന്ന് ഉത്തർപ്രദേശ് മുഖ്യമന്ത്രി യോഗി ആദിത്യനാഥ്. റോകിലെ ബാബ മാഥ് മഠിലെ പരിപാടിയിൽ സംസാരിക്കുകയായിരുന്നു യോഗി. സനാതന ധർമയുടെ ഋഷിമാർ ഏതു പ്രശ്നത്തെയും നേരിടുമെന്നും പൊതുപ്രവർത്തനത്തിൽനിന്ന് അവരെ പിന്തിരിപ്പിക്കാൻ സാധിക്കില്ലെന്നും യോഗി പറഞ്ഞു.
“അഫ്ഗാനിസ്ഥാൻ, യുക്രെയ്ൻ, ഗാസ എന്നിവിടങ്ങളിൽ നിന്നെല്ലാം ജനം ഓടി രക്ഷപ്പെടുകയാണ്. എല്ലാ രാജ്യത്തെയും ദുരിതത്തിലായ മനുഷ്യർ ഇന്ത്യയിലേക്കും പ്രധാനമന്ത്രി നരേന്ദ്ര മോദിയിലേക്കുമാണ് ഉറ്റുനോക്കുന്നത്. ഇന്ത്യ മാത്രമാണ് ഏക പ്രതീക്ഷയെന്ന് അവർ വിശ്വസിക്കുന്നു. ഇന്ത്യയിലെ 140 കോടി ജനം ഒന്നിച്ച് ഒറ്റ ശക്തിയായി മാറുകയാണ്.
രാമ ക്ഷേത്രത്തിനായുള്ള പ്രക്ഷോഭത്തിലുൾപ്പെടെ ഋഷിമാർ വലിയ പങ്കു വഹിച്ചു. ഈ പരിപാടിയിൽ പങ്കെടുക്കാൻ രാജ്യത്തിന്റെ വിവിധ ഭാഗങ്ങളിൽനിന്നുള്ള ഋഷിമാർ എത്തിയിട്ടുണ്ട്. ഇവിടെ ജാതിയുടെയോ മതത്തിന്റെയോ വേർതിരിവ് ഇല്ല. എല്ലാ വിഭാഗം ആരാധനകളും പാരമ്പര്യങ്ങളും വിശ്വാസങ്ങളും സനാതന ധർമത്തിന്റെ അന്തഃസ്സത്ത മനസ്സിലാക്കാനാണ് ശ്രമിക്കുന്നത്”- യോഗി പറഞ്ഞു.
സനാതന ധർമം തുടച്ചു നീക്കപ്പെടേണ്ടതാണെന്ന് തമിഴ്നാട് മന്ത്രി ഉദയനിധി സ്റ്റാലിൻ പറഞ്ഞത് വലിയ വിവാദങ്ങൾക്ക് വഴിതുറന്നിരുന്നു. ഇതിനെതിരെ ബിജെപി ശക്തമായി രംഗത്തെത്തി. മുൻപും സനാതന ധർമത്തെ പുകഴ്ത്തി യോഗി പ്രസ്താവന നടത്തിയിരുന്നു.
