മണിപ്പുർ വിഷയത്തിൽ കേന്ദ്രത്തിനെതിരെയുള്ള പ്രതിപക്ഷത്തിന്റെ അവശ്വാസ പ്രമേയത്തിന് അനുമതി. ലോക്സഭാ സ്പീക്കർ ഓം ബിർലയാണ് അനുമതി നൽകിയത്. എന്ന് അവതരിപ്പിക്കുമെന്ന്. വ്യക്തമായിട്ടില്ല. വിവിധ കക്ഷിനേതാക്കളുമായി ആലോചിച്ചശേഷം ഈ തീയതി സ്പീക്കർ ഉടൻ അറിയിക്കുമെന്നാണ് വിവരം. അസമിൽനിന്നുള്ള കോൺഗ്രസ് എംപി ഗൗരവ് ഗോഗോയ് ആണ് 50 പേരുടെ പിന്തുണയോടെ അവിശ്വാസ പ്രമേയത്തിന് നോട്ടിസ് നൽകിയിരിക്കുന്നത്.
സഭയിൽ മണിപ്പുർ കലാപം ചർച്ചയിൽ കൊണ്ടുവരാനും മറുപടി പറയാൻ പ്രധാനമന്ത്രിയെ നിർബന്ധിതനാക്കാനുമാണ് അവിശ്വാസ പ്രമേയം കൊണ്ടുവരുന്നത്. മണിപ്പുർ വിഷയത്തിൽ പ്രധാനമന്ത്രി പ്രസ്താവന നടത്തണമെന്ന് പ്രതിപക്ഷം സമ്മേളനം തുടങ്ങിയപ്പോൾ മുതൽ ആവശ്യപ്പെടുന്നുണ്ട്.
2014ൽ അധികാരത്തിലെത്തിയ മോദി സർക്കാർ ഇതു രണ്ടാം തവണയാണ് അവിശ്വാസ പ്രമേയം നേടിരുന്നത്. ആദ്യ മോദി സർക്കാരിന്റെ കാലത്ത് 2018 ജൂലൈ 20നായിരുന്നു അവിശ്വാസ പ്രമേയം ആദ്യം അവതരിപ്പിച്ചത്. അന്ന് 126നെതിരെ 325 എംപിമാരുടെ വോട്ടിനാണ് മോദി സർക്കാർ ജയിച്ചത്. നിലവിൽ ഒഴിവുള്ളത് ഉൾപ്പെടെ 543 സീറ്റുകളാണ് ലോക്സഭയിലുള്ളത്. ഇതിൽ ബിജെപി നേതൃത്വം നൽകുന്ന എൻഡിഎയിൽ 330 അംഗങ്ങളും പ്രതിപക്ഷ സഖ്യത്തിൽ 140 പേരുമുണ്ട്. 60 പേർ ഇരു സഖ്യത്തോടും കൂറു പുലർത്തുന്നവരല്ല.
