ജയ്പുർ സർക്കാർ സൗജന്യമായി മൊബൈൽ നൽകുന്നെന്നു പറഞ്ഞുപറ്റിച്ചു പതിനേഴുകാരിയെ കൊണ്ടുപോയി ബലാത്സംഗം ചെയ്തു. സർക്കാർ ജീവനക്കാരൻ സുനിൽ കുമാർ ജൻഗിദ് ആണ് പ്രതി. ജലവിതരണ വിഭാഗത്തിലെ കാഷ്യറാണ് ഇയാൾ. ഓഗസ്റ്റ് പത്തിനു നടന്ന സംഭവം ഇപ്പോഴാണു പുറത്തുവന്നത്.
പെൺകുട്ടിയുടെ മാതാപിതാക്കൾ വീട്ടിലില്ലാത്ത സമയത്തെത്തിയ പ്രതി, സംസ്ഥാന സർക്കാർ സൗജന്യമായി ഫോൺ നൽകുന്നുണ്ടെന്നു കുട്ടിയെ വിശ്വസിപ്പിക്കുകയായിരുന്നു. പെൺകുട്ടിയുടെ നമ്പർ അതിൽ ഉൾപ്പെട്ടിട്ടുണ്ടെന്നും പറഞ്ഞു. അമ്മയോട് സംസാരിക്കണമെന്നു പെൺകുട്ടി പറഞ്ഞെങ്കിലും താൻ പിന്നീട് അമ്മയോട് കാര്യങ്ങൾ പറയാമെന്നും ഇയാൾ വ്യക്തമാക്കി.
തുടർന്നു പെൺകുട്ടിയെ കാറിൽ കയറ്റിക്കൊണ്ടുപോയി മുറിയിലെത്തിച്ചു പീഡിപ്പിക്കുകയായിരുന്നു. ബഹളം വച്ച് തന്നെ കത്തിവച്ചു പ്രതി ആക്രമിച്ചതായും പെൺകുട്ടി പരാതിയിൽ പറയുന്നുണ്ട്. സംഭവത്തിനു പിന്നാലെ പ്രദേശവാസികൾ ഇയാളെ പിടികൂടുകയും ജലവിഭവ വകുപ്പിനു മുന്നിലെ ഗേറ്റിനു സമീപത്തു കെട്ടിയിടുകയും ചെയ്തു. ഇയാളെ മർദിക്കുന്നതിന്റെ വിഡിയോയും ചിത്രീകരിച്ചു.
മർദനത്തിനു പിന്നാലെ പൊലീസിനു കൈമാറാതെ പ്രദേശവാസികൾ ഇയാളെ സ്വതന്ത്രനാക്കി. തോഡാഭിം പൊലീസ് സ്റ്റേഷനിൽ പെൺകുട്ടി ഇയാൾക്കെതിരെ പരാതി നൽകി. പോക്സോ അടക്കമുള്ള വകുപ്പുകൾ ചുമത്തിയാണ് ഇയാൾക്കെതിരെ കേസെടുത്തിരിക്കുന്നതെന്നു പൊലീസ് പറഞ്ഞു.
