പത്തനംതിട്ട : സംസ്ഥാന ജൈവ വൈവിധ്യ ബോർഡിൻ്റെ മികച്ച സംരക്ഷക കർഷകനുള്ള പുരസ്ക്കാരം എഴുമാറ്റൂർ അമൃതധാര ഗോശാല ചെയർമാൻ അജയകുമാർ വല്യുഴത്തിലിന്. പത്തൊമ്പതിലധികം ഇനങ്ങളിലായി ഏതാണ്ട് എഴുന്നൂറോളം പശുക്കളെ അമൃതധാര ഗോശാലയിൽ സംരക്ഷിച്ചു വരുന്നുണ്ട്.നാടൻ പശുവധിഷ്ഠിത കാർഷിക സമ്പ്രദായത്തിൻ്റെയും പ്രചാരകനാണ് അജയകുമാർ വല്യുഴത്തിൽ.പ്രവാസിയായിരുന്ന അജയകുമാർ 2003ലാണ് നാല് പശുക്കളുമായി അമൃതധാരയ്ക്ക് തുടക്കം കുറിച്ചത്.പിന്നീട് അറവു ശാലകളിൽ നിന്ന് സംരക്ഷിക്കുന്നവ ഉൾപ്പെടെ ഘട്ടംഘട്ടമായി എഴുന്നൂറ് പശുക്കളിലെത്തി.
ഗോശാലയോട് ചേർന്ന് ജൈവകൃഷിത്തോട്ടവും പരിപാലിച്ച് പോരുന്നു.ഒമാനിലെ മുസന്നം മരുഭൂമിയിൽ ജൈവകൃഷി നടത്തി വാർത്തകളിൽ ഇടംപിടിച്ച അജയകുമാർ നിരവധി ദേശീയ – സംസ്ഥാന പുരസ്കാരങ്ങൾക്കും അർഹനായിട്ടുണ്ട്. കേരള സർക്കാറിൻ്റെ അംഗീകൃത ഫാം സ്കൂളായി ഇടംപിടിച്ച അമൃതധാരയിൽ ഇതിനോടകം പതിനായിരത്തിലധികം വിദ്യാർത്ഥികൾ പഠന സന്ദർശനങ്ങളും പരിശീലനങ്ങളും നടത്തിയിയിട്ടുണ്ട്.
