വാഹനമോഡിഫിക്കേഷനുമായി ബന്ധപ്പെട്ട് മുഖ്യമന്ത്രി വി ഡി സതീശനെ ട്രോളി എ.എ റഹീം എംപി. ജെൻസിയോട് കള്ളത്തരം കാണിക്കാൻ നിക്കരുതെന്നും അവർ ചുവന്ന കരങ്ങളോടെ തൂക്കുമെന്നും എഎ റഹീം പറഞ്ഞു. പൂക്കി മുഖ്യമന്ത്രി എന്നാണല്ലോ അദ്ദേഹം സ്വയം ഇട്ടിരിക്കുന്ന പേര്. യഥാർഥ വിവരങ്ങൾ പുറത്തുവന്നപ്പോൾ പൂക്കി മുഖ്യമന്ത്രി എന്നതിൽ അക്ഷരം മാറ്റിയാണ് കമന്റുകൾ വരുന്നതെന്നും അദ്ദേഹം പറഞ്ഞു. തിരഞ്ഞെടുപ്പ് കാലത്ത് യുവാക്കൾക്ക് വി ഡി സതീശൻ പൊളളയും നിരുത്തരവാദപരമായ വാഗ്ദാനമാണ് നൽകിയതെന്നും അദ്ദേഹം ആഞ്ഞടിച്ചു.
ധവളപത്രം കേരളത്തിനെതിരായ കേന്ദ്രനീക്കങ്ങളുടെ അതേ രൂപരേഖയെന്ന് എ.എ റഹീം എംപി വിമർശിച്ചു. ധവളപത്രത്തിലെ പ്രഖ്യാപനങ്ങൾ പൊതുമേഖലയെ തകർക്കുന്നവയാണ്. പെൻഷൻ പ്രായം ഉയർത്തിയാൽ അതി ശക്തമായ യുവജനപ്രക്ഷോഭങ്ങൾ ഉണ്ടാകുമെന്നും ഇക്കാര്യത്തിൽ യൂത്ത് കോൺഗ്രസ് നിലപാട് വ്യക്തമാക്കണമെന്നും എഎ റഹീം ആവശ്യപ്പെട്ടു. കേരളം ആർജിച്ചെടുത്ത നേട്ടങ്ങളെ അപായപ്പെടുത്താനും വളർച്ചയില്ലാതാക്കാനുമുള്ള കാര്യങ്ങളാണ് ധവളപത്രത്തിലുള്ളതെന്നും അദ്ദേഹം പറഞ്ഞു.
