വാട്സാപ് മുഖേന ‘വികസിത് ഭാരത്’ സന്ദേശങ്ങൾ അയയ്ക്കുന്നത് അവസാനിപ്പിക്കാൻ കേന്ദ്രസർക്കാരിനു നിർദേശം നൽകി തിരഞ്ഞെടുപ്പ് കമ്മിഷൻ. തിരഞ്ഞെടുപ്പ് പെരുമാറ്റച്ചട്ടത്തിന്റെ ഭാഗമായാണു നടപടി. ഇതു സംബന്ധിച്ചു റിപ്പോർട്ട് നൽകാൻ ഇലക്ട്രോണിക്സ് ആൻഡ് ഇൻഫർമേഷൻ ടെക്നോളജി മന്ത്രാലയത്തിനും തിരഞ്ഞെടുപ്പ് കമ്മിഷൻ നിർദേശം നൽകി.
വാട്സാപ് സന്ദേശങ്ങൾ അയച്ചതു വഴി പെരുമാറ്റച്ചട്ടം ലംഘിച്ചതായി നിരവധി പരാതികൾ ലഭിച്ചതിനെ തുടർന്നാണ് തിരഞ്ഞെടുപ്പ് കമ്മിഷന്റെ നടപടി. മാർച്ച് 15ന്, ലോക്സഭാ തിരഞ്ഞെടുപ്പ് പ്രഖ്യാപിക്കുന്നതിനു മുൻപാണു പ്രധാനമന്ത്രിയുടെ കത്ത് അടങ്ങിയ സന്ദേശം അയച്ചതെന്നും എന്നാൽ സാങ്കേതിക തകരാർ മൂലം ചില സന്ദേശങ്ങൾ വൈകുകയായിരുന്നെന്നും മന്ത്രാലയം മറുപടി നൽകി.
ലോക്സഭാ തിരഞ്ഞെടുപ്പ് പ്രചാരണത്തിൻ്റെ ഭാഗമായി, ഇലക്ട്രോണിക്സ് ആൻഡ് ഇൻഫർമേഷൻ ടെക്നോളജി മന്ത്രാലയത്തിൻ്റെ വികസിത് ഭാരത് സമ്പർക്ക് എന്നെഴുതിയ വാട്സാപ് നമ്പരിൽനിന്നാണ് മോദി സർക്കാരിൻറെ നേട്ടങ്ങൾ വിവരിച്ചുകൊണ്ടുള്ള സന്ദേശമെത്തിയത്. ജനങ്ങൾക്കുള്ള പ്രധാനമന്ത്രിയുടെ തുറന്ന കത്തും സന്ദേശത്തിലുണ്ട്.
പാവപ്പെട്ടവരിലും കർഷകരിലും യുവതീയുവാക്കളിലും സ്ത്രീകളിലും 10 വർഷത്തെ ഭരണമുണ്ടാക്കിയ നേട്ടങ്ങൾ സന്ദേശത്തിൽ ചൂണ്ടിക്കാണിക്കുന്നു.
