തിരുവനന്തപുരം: ധനമന്ത്രി കെ.എന്‍ ബാലഗോപാല്‍ അവതരിപ്പിച്ച ബഡ്ജറ്റിന്മേലുള്ള പൊതുചര്‍ച്ചകള്‍ക്ക് നിയമസഭയില്‍ ഇന്ന് തുടക്കം കുറിക്കും. 15 -ആം നിയമസഭയുടെ ആദ്യ ചോദ്യോത്തര വേളയും ഇന്ന് നടക്കും.
കൊവിഡ് നിയന്ത്രണങ്ങളുടെ ഭാഗമായി ഉദ്യോഗസ്ഥരുടെ എണ്ണം കുറച്ചതിനാല്‍ കഴിഞ്ഞ ദിവസങ്ങളില്‍ ചോദ്യോത്തര വേള ഉണ്ടായിരുന്നില്ല. സഭാ പ്രവര്‍ത്തനങ്ങള്‍ക്ക് നിശ്ചയിച്ചിട്ടുള്ള ഉദ്യോഗസ്ഥര്‍ക്ക് നിയന്ത്രണങ്ങളില്‍ ഇളവ് നല്‍കിയ സാഹചര്യത്തിലാണ് ഇന്നുമുതല്‍ ചോദ്യോത്തര വേള ആരംഭിക്കുന്നത്.
അതോടൊപ്പം സംസ്ഥാനത്തെ ഡ‍ിജിറ്റല്‍ വിദ്യാഭ്യാസത്തിന്റെ പോരായ്മകള്‍ പരിഹരിക്കാന്‍ മുഖ്യമന്ത്രി പിണറായി വിജയന്‍ വിളിച്ച ഉന്നതതല യോഗം ഇന്ന് നടക്കും. എല്ലാവര്‍ക്കും ഡിജിറ്റില്‍ സൗകര്യങ്ങള്‍ ഉറപ്പാക്കിയിട്ടേ സ്കൂള്‍ തല ഓണ്‍ലൈന്‍ ക്ലാസ് തുടങ്ങൂ .എന്ന് വിദ്യാഭ്യാസ വകുപ്പ് മന്ത്രി വി.ശിവന്‍കുട്ടി വ്യക്തമാക്കിയിരുന്നു. വിദ്യാര്‍ത്ഥികള്‍ക്ക് ടിവിയും മൊബൈലും നല്‍കാന്‍ എംഎല്‍എ ഫണ്ട് ഉപയോഗിക്കാന്‍ അനുവദിക്കണണെന്ന നിര്‍ദ്ദേശം പ്രതിപക്ഷനേതാവ് വി.ഡി സതീശനും നേരത്തെ മുന്നോട്ട് വച്ചിരുന്നു. ഇത് സംബന്ധിച്ച കാര്യങ്ങളും ഇന്ന് നടക്കുന്ന ഉന്നതതല യോഗം വിലയിരുത്തും.
