പ്ലസ്ടു പരീക്ഷയിൽ എല്ലാ വിഷയങ്ങൾക്കും എ പ്ലസ് ഇക്കാലത്ത് വാർത്തയൊന്നുമല്ലായിരിക്കാം. എന്നാൽ അടിച്ചിപ്പുഴ ട്രൈബൽ നഗറിൽ ഇത് ചരിത്രസംഭവമാണ്. പരീക്ഷയിൽ എല്ലാ വിഷയങ്ങൾക്കും എ പ്ലസ് ലഭിച്ചതോടെ നാട്ടിൽ ചരിത്രംകുറിച്ച് താരമായിരിക്കുകയാണ് അശ്വതിമോൾ.
അടിച്ചിപ്പുഴ, ചൊള്ളനാവയൽ, കരികുളം നഗറുകളിലെ അഞ്ഞൂറിലധികം പട്ടികവർഗ കുടുംബങ്ങളിൽനിന്നും ആദ്യമാണ് ഈ വിജയം. പ്ലസ്ടു സയൻസ് പരീക്ഷയിൽ ഈ നാട്ടിൽനിന്നും ആദ്യമായിട്ടാണ് ഒരു കുട്ടി ഈ നേട്ടം കൈവരിക്കുന്നത്. പഠിച്ചത് തിരുവനന്തപുരത്തായതിനാൽ നാടറിഞ്ഞുവരാൻ അൽപം വൈകി.
നാറാണംമൂഴി പഞ്ചായത്തിൽ അടിച്ചിപ്പുഴ ചൊള്ളനാവയൽ പതാലിൽ കെ.ആർ. കുഞ്ഞുമോന്റെയും ശ്രീദേവി കുഞ്ഞുമോൻ്റെയും മകളാണ് കെ.പി. അശ്വതിമോൾ. മേസ്തിരിപ്പണി ചെയ്താണ് കുഞ്ഞുമോൻ കുടുംബം പുലർത്തുന്നത്. തിരുവനന്തപുരം കട്ടേല ഡോ. എഎംഎംആർ ഹയർസെക്കൻഡറി സ്കൂളിലാണ് അശ്വതി പ്ലസ്ടു കോഴ്സിന് പഠിച്ചത്.
95 ശതമാനം മാർക്ക് നേടി സ്കൂളിൽ ഒന്നാം സ്ഥാനത്തെത്തി. എസ്എസ്എൽസി പരീക്ഷയിലും എല്ലാ വിഷയങ്ങൾക്കും എപ്ലസ് നേടിയാണ് അശ്വതി വിജയിച്ചത്. ഒരു വർഷം നീറ്റ് പരീക്ഷയ്ക്കായുള്ള കോച്ചിങ്ങിന് പോകാനുള്ള തയ്യാറെടുപ്പിലാണ് ഈ വിദ്യാർഥിനി.
അതിനായി ട്രൈബൽ ഡിപ്പാർട്ട്മെൻ്റിൻ്റെ കോച്ചിങ് സെന്ററിൽ പ്രവേശനം ലഭിക്കുന്നതിനായി കാത്തിരിക്കുകയാണ്. സഹോദരന്മാരായ അജിത്ത് ടിടിസിക്കും ആരോമൽ ആറാം ക്ലാസിലും പഠിക്കുന്നു. ആർഎസ്എസ് ശബരിഗിരി ജില്ലാ ഭാരവാഹികൾ വീട്ടിലെത്തി അശ്വതിയെ അനുമോദിച്ചു.
