പരന്നവായനയുടെ ഗുണമൊന്നും നിലമ്പൂരിലെ എൽഡിഎഫ് സ്ഥാനാർഥി എം. സ്വരാജിൽ കാണുന്നില്ലെന്ന് കോൺഗ്രസ് നേതാവ് കെ. മുരളീധരൻ. ആശാ സമരത്തെ കണ്ടില്ലെന്ന് നടിച്ച സാംസ്‌കാരിക നായകന്മാർ എന്തുകണ്ടിട്ടാണ് സ്വരാജിനെ പിന്തുണയ്ക്കുന്നതെന്നും അദ്ദേഹം ചോദിച്ചു. ആശാ വർക്കർമാരുടെ സംസ്ഥാനതല സമരയാത്രയ്ക്ക് തിരുവനന്തപുരം നെടുമങ്ങാട് നൽകിയ സ്വീകരണത്തിൽ സംസാരിക്കുകയായിരുന്നു മുരളീധരൻ.
മുഖ്യമന്ത്രി ക്യാപ്റ്റൻ പരിവേഷം മാറ്റിവെച്ച് നിലമ്പൂരിലൂടെ ഓടുകയാണ്. വികസനം പറയാനില്ലാത്തതുകൊണ്ടാണ് കോൺഗ്രസ് എംപി.യുടെയും എംഎൽഎയുടെയും വാഹനം പരിശോധിക്കാനിറങ്ങിയത്. യുഡിഎഫ് സർക്കാർ അധികാരത്തിൽവന്നാൽ ഒരാഴ്‌ചയ്ക്കുള്ളിൽ ആശമാരുടെ വേതനം കൂട്ടുമെന്നും മുരളീധരൻ പറഞ്ഞു.
നിലമ്പൂരിലെ എൽഡിഎഫ് സ്ഥാനാർഥിവരെ ആശാ പ്രവർത്തകരെ അപമാനിച്ചു. പരന്ന വായന മാത്രമാണോ ഒരു സ്ഥാനാർഥിക്ക് ജയിക്കാനുള്ള യോഗ്യത? പരന്ന വായനകൊണ്ട് ജനങ്ങൾക്ക് എന്ത് ഗുണം? വായിച്ച അറിവ് പോലും ജനങ്ങൾക്കായി ഉപയോഗപ്പെടുത്തിയില്ല. അതുകൊണ്ടാണ് തൃപ്പൂണിത്തുറയിൽ സ്വരാജ് തോറ്റതെന്നും മുരളീധരൻ പറഞ്ഞു.
