മൂന്നാംതവണയും സർക്കാർ രൂപവത്കരിക്കാനുള്ള അവസരം തന്നതിന് ജനങ്ങളോട് നന്ദി പറയുന്നുവെന്ന് പ്രധാനമന്ത്രി നരേന്ദ്രമോദി. ഇത് ജനാധിപത്യത്തിൻ്റെ വിജയമാണെന്നും ജനങ്ങൾ തന്നിൽ അർപ്പിച്ച വിശ്വാസത്തിന്റെ വിജയമാണെന്നും പ്രധാനമന്ത്രി പറഞ്ഞു. ഉത്തർപ്രദേശിലെ വാരാണസിയിൽ ജനങ്ങളെ അഭിസംബോധന ചെയ്യുകയായിരുന്നു മോദി.
നിങ്ങളുടെ സ്നേഹത്തിനും ആശിർവാദത്തിനും നന്ദി. ഇന്ന് മംഗളമായൊരു ദിനമാണ്. തുടർച്ചയായ മൂന്നാം തവണ സർക്കാർ ഉണ്ടാക്കാൻ പോവുകയാണ് ബിജെപി. ജനം എന്നിൽ വിശ്വസിച്ചു. ഇത് ജനാധിപത്യത്തിൻ്റെ വിജയമാണ്. മൂന്നാമതും അധികാരത്തിലേറാൻ കഴിഞ്ഞത് ചരിത്രമാണ്.
ആന്ധ്രപ്രദേശ്, ഒഡിഷ, അരുണാചൽ പ്രദേശ് തുടങ്ങിയ സംസ്ഥാനങ്ങളിൽ കോൺഗ്രസ് തകർന്നടിഞ്ഞു. അവിടെയെല്ലാം വീണ്ടും എൻഡിഎ സീറ്റുകൾ തൂത്തുവാരി. തെലങ്കാനയിൽ ബിജെപി സീറ്റ് വർധിപ്പിച്ചു. മധ്യപ്രദേശ്, ഗുജറാത്ത്, ഉത്തരാഖണ്ഡ് എന്നീ സംസ്ഥാനങ്ങളിൽ ബിജെപിക്ക് വലിയ വിജയം നേടാനായെന്നും മോദി പറഞ്ഞു.
കേരളത്തിലെ സുരേഷ് ഗോപിയുടെ വിജയത്തെക്കുറിച്ചും പ്രധാനമന്ത്രി പ്രസംഗത്തിൽ പരാമർശിച്ചു. കേരളത്തിൽ ബിജെപി അക്കൗണ്ട് തുറന്നു. കേരളത്തിലെ പ്രവർത്തകർ പാർട്ടിക്കായി പോരാടി, പീഡനങ്ങൾക്കിടയിലും അവർ പാർട്ടിക്കുവേണ്ടി പ്രവർത്തിച്ചു. കേരളത്തിലെ പ്രവർത്തകരുടെ കഠിനാധ്വാനത്തിൻ്റെ ഫലമായാണ് സുരേഷ് ഗോപി വിജയിച്ചത്, മോദി പറഞ്ഞു.
