തേരാപാര എന്ന വെബ്സീരീസിലൂടെ പ്രശസ്തരായ “കരിക്ക്” ടീം നെറ്റ്ഫ്ളിക്സില്‍ അരങ്ങേറ്റം കുറിക്കാനൊരുങ്ങുന്നു. റിപ്പര്‍ എന്ന് പേരിട്ടിരിക്കുന്ന സ്കെച്ച്‌ വീഡിയോയാണ് ആദ്യമായി ഇവര്‍ നെറ്റ്ഫ്ളിക്സില്‍ റിലീസ് ചെയ്യുന്നത്. ഏപ്രില്‍ മൂന്നാം തീയതി രാവിലെ 11 മണിക്കാണ് വീഡിയോ നെറ്റ്ഫ്ളിക്സില്‍ റിലീസ് ചെയ്യുക. കരിക്ക് ടീം തന്നെയാണ് റിപ്പറിന്റെ പോസ്റ്ററും വീഡിയോ റിലീസ് വിവരങ്ങളും പുറത്തുവിട്ടിരിക്കുന്നത്. അനു കെ അനിയന്‍, ശബരീഷ് സജിന്‍, ജീവന്‍ സ്റ്റീഫന്‍, കിരണ്‍ വിയ്യത്ത്, അര്‍ജുന്‍ രത്തന്‍ എന്നിവരുടെ ചിത്രങ്ങളാണ് പോസ്റ്ററിലുള്ളത്.
വളരെ പെട്ടെന്ന് നിരവധി ആരാധകരെ സമ്ബാദിച്ചവരാണ് കരിക്ക് ടീം. 6.71 മില്യണ്‍ സബ്സ്ക്രൈബേഴ്സാണ് ഇവരുടെ യൂട്യൂബ് ചാനലിനുള്ളത്. ഇവരുടെ പുതിയ ഓരോ സീരിസിനായും ഏറെ ആകാംഷയോടെയാണ് ആരാധകര്‍ കാത്തിരിക്കുന്നത്. അതുപോലെ തന്നെ റിപ്പറിനായും ഏവരും പ്രതീക്ഷയോടെ കാത്തിരിക്കുകയാണ്.
