മാര്‍ക്ക് ലിസ്റ്റ് തയ്യാറാക്കി നല്‍കാന്‍ വിദ്യാര്‍ത്ഥിയില്‍ നിന്ന് കൈക്കൂലി വാങ്ങി അറസ്റ്റിലായ എം.ജി സര്‍വ്വകലാശാല അസിസ്റ്റന്റ് സി.ജെ എല്‍സി മറ്റ് രണ്ട് വിദ്യാര്‍ത്ഥികളുടെ കൂടി മാര്‍ക്ക് തിരുത്തിയതായി സിന്‍ഡിക്കേറ്റ് ഉപസമിതി കണ്ടെത്തി. സംഭവത്തില്‍ വിശദമായ അന്വേഷണത്തിന് ഉപസമിതി ശുപാര്‍ശ ചെയ്തു. എംബിഎ സെക്ഷന്‍ ഓഫീസര്‍ക്ക് ജാഗ്രതക്കുറവ് ഉണ്ടായെന്നും ഇയാള്‍ക്കെതിരെ നടപടി വേണമെന്നും സമിതി റിപ്പോര്‍ട്ടിലുണ്ട്. എല്‍സിയുടേത് ഒറ്റപ്പെട്ട സംഭവമല്ലെന്നും സമാന തട്ടിപ്പുകള്‍ നേരത്തേയും നടത്തിയിട്ടുണ്ട് എന്നുമാണ് സമിതി കണ്ടെത്തല്‍ വെളിപ്പെടുത്തുന്നത്.
സര്‍ട്ടിഫിക്കറ്റിനും മാര്‍ക്ക് ലിസ്റ്റിനും ഒന്നരലക്ഷം രൂപ കൈക്കൂലി വാങ്ങിയത് എല്‍സി മാത്രമാണ് എന്നാണ് ഉപസമിതിയുടെ കണ്ടെത്തല്‍. പരാതിക്കാരിയുടെ മാര്‍ക്ക് ലിസ്റ്റ് എല്‍സി തിരുത്തിയിട്ടില്ല എന്നും ഉപസമിതി കണ്ടെത്തിയിട്ടുണ്ട്. ഇത് സംബന്ധിച്ച റിപ്പോര്‍ട്ടാണ് സര്‍വ്വകലാശാലയ്ക്ക് സിന്‍ഡിക്കേറ്റ് ഉപസമിതി നല്‍കിയിരിക്കുന്നത്.
എന്നാല്‍, മറ്റു ചില വിദ്യാര്‍ത്ഥികളുടെ മാര്‍ക്ക് ലിസ്റ്റില്‍ തിരിമറി നടത്തിയിട്ടുണ്ടെന്ന സൂചനകള്‍ ലഭിച്ചതിനെ തുടര്‍ന്ന് വിശദമായ അന്വേഷണം നടത്താന്‍ ഉപസമിതി ശുപാര്‍ശ നല്‍കിയിരിക്കുകയാണ്. സോഫ്റ്റ് വെയറിലേക്ക് മാര്‍ക്കുകള്‍ രേഖപ്പെടുത്തുന്ന ഘട്ടത്തിലാണ് ഇത്തരം ക്രമക്കേട് നടന്നത് എന്ന സൂചനയാണ് ഉപസമിതിക്ക് ലഭിച്ചിട്ടുള്ളത്. എല്‍സിയുടെ യൂസര്‍നെയിമില്‍ നിന്നാണ് ക്രമക്കേട് നടന്നിട്ടുള്ളത് എന്ന് കണ്ടെത്തിയെങ്കിലും ഇതില്‍ വ്യക്തത വരുത്താന്‍ എല്‍സിയുടെ മൊഴി എടുക്കണമെന്ന നിലപാടാണ് ഉപസമിതി റിപ്പോര്‍ട്ടില്‍ വ്യക്തമാക്കുന്നത്.
സെക്ഷനിലെ മറ്റു ജീവനക്കാര്‍ക്ക് പണം നല്‍കിയിട്ടില്ലെന്ന് എല്‍സി മൊഴി നല്‍കിയിട്ടുണ്ട്. മൊഴി ശരിയാണെന്നാണ് സമിതി കണ്ടെത്തല്‍. പണം കൈപ്പറ്റിയിട്ടില്ലെങ്കിലും സെക്ഷന്‍ ഓഫീസറുടെ ഭാഗത്ത് ഗുരുതരമായ പിഴവ് ഉണ്ടായി എന്നാണ് അന്വേഷണ സമിതി കണ്ടെത്തിയിരിക്കുന്നത്.
സര്‍വ്വകലാശാലയിലെ വിവിധ മൂല്യനിര്‍ണയ ക്യാമ്പുകളുടെ ചുമതല സെക്ഷന്‍ ഓഫീസര്‍ക്കാണ്. ആഴ്ചയില്‍ രണ്ട് ദിവസം മാത്രമാണ് സെക്ഷന്‍ ഓഫീസര്‍ എംബിഎ വിഭാഗത്തിലെത്തിയിരിക്കുന്നത് എന്നുള്ള ഗുരുതരമായ പിഴവും കണ്ടെത്തിയിരിക്കുന്നു. ഇത്തരം ശ്രദ്ധക്കുറവാണ് ക്രമക്കേടിന് അവസരം ഒരുക്കിയതെന്നാണ് കണ്ടെത്തല്‍. സെക്ഷന്‍ ഓഫീസര്‍ക്കെതിരെ നടപടി വേണമെന്നും റിപ്പോര്‍ട്ടില്‍ ആവശ്യപ്പെട്ടിട്ടുണ്ട്.
ഭാവിയില്‍ ഇത്തരം സംഭവങ്ങള്‍ ആവര്‍ത്തിക്കാതിരിക്കാന്‍ മൂല്യനിര്‍ണയ രീതിയില്‍ ചില മാറ്റങ്ങള്‍ വരുത്താന്‍ സമിതി ശുപാര്‍ശ ചെയ്തിട്ടുണ്ട്. ഉത്തരക്കടലാസുകള്‍ മൂല്യ നിര്‍ണയം നടത്തുന്ന അധ്യാപകര്‍ നേരിട്ട് സോഫ്റ്റ് വെയറില്‍ മാര്‍ക്കുകള്‍ രേഖപ്പെടുത്തണമെന്ന് സമിതി കര്‍ശനമായി നിര്‍ദ്ദേശിക്കുന്നുണ്ട്. ഏഴായിരം ഡിഗ്രി സര്‍ട്ടിഫിക്കറ്റുകള്‍ സര്‍വ്വകലാശാലയില്‍ കെട്ടിക്കിടപ്പുണ്ടെന്നും സമിതി കണ്ടെത്തി. ഇവ വിതരണം ചെയ്യാന്‍ പ്രത്യേക ക്യാമ്പ് ക്രമീകരിക്കണമെന്നും സമിതി നിര്‍ദ്ദേശിക്കുന്നുണ്ട്.
