ഡൽഹി മുഖ്യമന്ത്രി അരവിന്ദ് കെജ്‌രിവാളിൻ്റെ അറസ്റ്റിന് പിന്നാലെ നടത്തിയ പരാമർശത്തിൽ ജർമനിയെ പ്രതിഷേധം അറിയിച്ച് ഇന്ത്യ. ജർമൻ എംബസിയിലെ മുതിർന്ന ഉദ്യോഗസ്ഥനെ ശനിയാഴ്‌ച, ഇന്ത്യൻ വിദേശകാര്യ മന്ത്രാലയം വിളിച്ചു വരുത്തുകയും പ്രതിഷേധം അറിയിക്കുകയും ചെയ്തു. കെജ്രിവാളിന്റെ അറസ്റ്റിന് പിന്നാലെ ജർമനിയുടെ വിദേശകാര്യവക്താവ് പ്രസ്താവന പുറത്തിറക്കിയിരുന്നു.
ആരോപണം നേരിടുന്ന ഏതൊരു വ്യക്തിയെയും പോലെ കെജ്‌രിവാളിനും നീതിയുക്തവും നിഷ്‌പക്ഷവുമായ വിചാരണയ്ക്ക് അർഹതയുണ്ടെന്ന് ഉൾപ്പെടെയുള്ള പരാമർശങ്ങൾ ജർമൻ വിദേശകാര്യ മന്ത്രാലയത്തിന്റെ പ്രസ്താവനയിൽ ഉൾപ്പെട്ടിരുന്നു.
തുടർന്നാണ് ഇന്ത്യയിലെ ജർമൻ എംബസിയിലെ ഉന്നതോദ്യോഗസ്ഥൻ ജോർജ് എൻസ്‌വീലറിനെ വിദേശകാര്യ മന്ത്രാലയം വിളിച്ചുവരുത്തുകയും പ്രസ്‌താവനയ്ക്കെതിരേ ശക്തമായ പ്രതിഷേധം അറിയിക്കുകയും ചെയ്‌തത്. മാത്രമല്ല, ഇന്ത്യയുടെ നിയമനടപടിക്രമങ്ങളിലേക്കുള്ള കൈ കടത്തലാണെന്ന വിമർശനവും ഉന്നയിച്ചിട്ടുണ്ട്.
വ്യാഴാഴ്ച്‌ച രാത്രിയാണ് ഡൽഹി മദ്യനയവുമായി ബന്ധപ്പെട്ട കള്ളപ്പണം വെളുപ്പിക്കൽ കേസിൽ കെജ്‌രിവാളിനെ എൻഫോഴ്സ്മെന്റ് ഡയറക്റേറ്റ് (ഇ.ഡി.) അറസ്റ്റ് ചെയ്‌തത്. നിലവിൽ ഇ.ഡി. കസ്റ്റഡിയിലാണ് അദ്ദേഹം.
