കൊച്ചി മെട്രോ ആലുവയിൽ നിന്ന് അങ്കമാലിയിലേക്ക് നീട്ടുന്നതിനുള്ള വിശദമായ പദ്ധതി റിപ്പോർട്ടിനുള്ള പഠനം ആരംഭിച്ചു. ഹരിയാന ആസ്ഥാനമായുള്ള സിസ്ട്ര എംവിഎ കൺസൾട്ടിംഗ് ഇന്ത്യ പ്രൈവറ്റ് ലിമിറ്റഡാണ് കൊച്ചി മെട്രോയ്ക്കു വേണ്ടി ഡിപിആർ തയ്യാറാക്കുന്നത്. ആലുവയിൽ നിന്ന് നെടുമ്പാശേരി എയർപോർട്ട് വഴി ആങ്കമാലിയിലേക്ക് കൊച്ചി മെട്രോ വ്യാപിപ്പിക്കുന്ന മൂന്നാം ഘട്ട മെട്രോ പാതയുടെ വിശദ പദ്ധതി റിപ്പോർട്ടിനുള്ള പഠനമാണ് ആരംഭിച്ചത്.
1.031 കോടി രൂപ ചിലവഴിച്ചുള്ള ഡിപിആർ ആറ് മാസത്തിനുള്ളിൽ സമർപ്പിക്കാനാണ് നിർദേശം. കൊച്ചി മെട്രോയുടെ ഒന്നാം ഘട്ടം വിജയകരമായി മുന്നോട്ടുപോകുകയും രണ്ടാം ഘട്ടത്തിന്റെ ഭാഗമായുള്ള നിർമാണം പുരോഗമിക്കുകയും ചെയ്യുന്ന പശ്ചാത്തലത്തിലാണ് മെട്രോ നീട്ടുന്നതിനായുള്ള കൂടുതൽ ആലോചനകൾ നടക്കുന്നത്. മെട്രോ അങ്കമാലിവരെ ദീർഘിപ്പിക്കണം എന്നും കൊച്ചിൻ ഇന്റർനാഷണൽ എയർപോർട്ടുമായി മെട്രോ കണക്ടവിറ്റിവിറ്റി വേണം എന്നമുള്ള ദീർഘകാലത്തെ ആവശ്യത്തിന്റെ പ്രാരംഭ പ്രവർത്തനങ്ങൾക്കാണ് ഇപ്പോൾ തുടക്കം കുറിച്ചിരിക്കുന്നത് എന്ന് കൊച്ചി മെട്രോ റെയിൽ ലിമിറ്റഡ് മാനേജിംഗ് ഡയറക്ടർ ലോക്നാഥ് ബെഹ്റ വ്യക്തമാക്കി.
