മരക്കാറിന്റെ തീയറ്റര് റിലീസിനേച്ചൊല്ലിയുള്ള ചര്ച്ചകള് അന്തിമഘട്ടത്തിലേക്കെത്തുമ്പോള് മലയാള തീയറ്റര് മേഖലയെ ഒന്നടങ്കം ഞെട്ടിയ്ക്കുന്ന തീരുമാനത്തിലേക്കാണ് മോഹന്ലാലും ആശീര്വാദ് സിനിമാസും എത്തിയിരിയ്ക്കുന്നത്.മരയ്ക്കാറിന് പുറമെ മോഹന് ലാല് നായകനായി അഭിനയിയ്ക്കുന്ന അഞ്ച് സിനിമകള് കൂടി ഒടിടിയിലാവും റിലീസ് ചെയ്യുക. പൃഥിരാജ് സംവിധാനം ചെയ്ത ബ്രോ ഡാഡി, എലോണ്, ട്വല്ത്ത് മാന്, പ്രിയദര്ശന്റെ ബോക്സര്, വൈശാഖിന്റെ ബിഗ്ബജറ്റ് ചിത്രം എന്നിവയടക്കമാണ് ഒടിടി (OTT)യില് റിലീസ് ചെയ്യുകയെന്ന് നിര്മാതാവ് ആന്റണി പെരുമ്പാവൂര് പറഞ്ഞു.കോവിഡ് കാലത്തെ പ്രത്യേക സാഹചര്യങ്ങള് കണക്കിലെടുത്ത് നിര്മിയ്ക്കുന്ന സിനിമകളാണിത്. ഇവ ഒടിടികള്ക്ക് മാത്രമെ നല്കാനാവൂ. മോഹന്ലാലിന്റെയും പ്രിയദര്ശന്റെയും തന്റെയും സ്വപ്ന സിനിമയായ മരയ്ക്കാറിനോട് ഒരു പറ്റം തീയറ്റര് ഉടമകള് കാട്ടിയ വഞ്ചനയും പുതിയ സിനിമകൾ ഒടിടി പ്ലാറ്റ് ഫോമിലേക്ക് നല്കുന്നതിന് കാരണമായതായി ആന്റണി പെരുമ്പാവൂര് പറഞ്ഞു.
