പീരുമേട് : ശബരിമല മണ്ഡല മകരവിളക്ക് മഹോത്സവത്തിന് മുന്നോടിയായി നവംബര് 15ന് സന്നിധാനം തുറക്കാനിരിക്കെ ജില്ലാ പൊലീസ് മേധാവിയുടെ നേതൃത്വത്തിലുള്ള പൊലീസ് സംഘം വിവിധ സ്ഥലങ്ങളില് എത്തി ക്രമീകരണങ്ങള് വിലയിരുത്തി.
പരമ്ബരാഗത കാനനപാതയായ വണ്ടിപ്പെരിയാര് സത്രം, പുല്ലുമേട് എന്നിവിടങ്ങളില് പതിനഞ്ചിന് മുമ്ബ് തന്നെ മുഴുവന് സുരക്ഷാ ക്രമീകരണങ്ങളും പൂര്ത്തീകരിക്കാന് കഴിയുമെന്ന് ജില്ലാ പൊലീസ് മേധാവി വി. യു. കുര്യാക്കോസ് അറിയിച്ചു.
സുരക്ഷ ഒരുക്കുന്നതിന്റെ ഭാഗമായി സത്രം പുല്ലുമേട് പാതയില് കാടുകള് വെട്ടിത്തെളിച്ചു. റോഡ് അറ്റകുറ്റപ്പണിയാണ് ഇനി പൂര്ത്തിയാകാനുള്ളത്.
റവന്യു, പഞ്ചായത്ത്, വനം വകുപ്പുകള് സംയുക്തമായാണ് മണ്ഡലകാലത്തോടനുബന്ധിച്ച് ഇതുവഴിയെത്തുന്ന അയ്യപ്പഭക്തര്ക്ക് ആവശ്യമായ സുരക്ഷാ ക്രമീകരണങ്ങള് ഏര്പ്പെടുത്തുന്നത്. മേഖലയില് സ്പെഷ്യല് പൊലീസ് കണ്ട്രോള് റൂം പ്രവര്ത്തനം ആരംഭിക്കുമെന്നും ജില്ലാ പോലീസ് മേധാവി പറഞ്ഞു.
സ്പെഷ്യല് ബ്രാഞ്ച് ഡിവൈ.എസ്.പി. സി. ജെ. മാര്ട്ടിന്, പീരുമേട് ഡിവൈ.എസ്.പി. ജെ. കുര്യാക്കോസ്, വണ്ടിപ്പെരിയാര് പൊലീസ് ഇന്സ്പെക്ടര് ഫിലിപ്പ് സാം എന്നിവരും സംഘത്തിലുണ്ടായിരുന്നു.
